Hatton wala pa kapirma kontrata

Cebu - Gikompirmar ni Gareth Williams, ang abogado ni Ricky Hatton nga ila na nga nadawat ang kontrata alang sa umaabot niini nga away batok ni Manny Pacquiao karong Mayo 2 didto sa Las Vegas.

Wala pa hinuon kini mapirmahi ni Hatton, apan ang British fighter mipadayag nga iya kining pirmahan sa umaabot nga mga adlaw.

Ang nagkahanap unta nga away nilipang og balik niadtong Biyernes human si Pacquiao, kinsa gikan pa sa yanong kadaugan batok ni Oscar De la Hoya niadtong Disyembre 7 (oras dinhi sa Pilipinas) nipirma sa kontrata ug gipadala ngadto sa kampo sa promoter sa Top Rank didto sa Las Vegas.

Nabaniog nga dili madayon ang maong away gumikan kay ang matag kampo wala magkauyon kun unsaon pagbahin ang kita unya sa maong away. Hinuon si Pacquiao dali  kaayong nakigsabot sa iyang kampo hinungdan nga nahikay ang gi-atngan nga kumbati.

Isipon unya ang maong away nga fight of the year tungod kay ang big-punching Hatton (45-1), ubanan sa iyang batalyon nga mga dumadapig sa iyang pakigsangka batok sa mangtas nga pound-for-pound fighter gikan sa Pilipinas sa gikatakda nilang 12 ka hugna nga kumbati sa junior welterweight.

Bugtong pilde ni Hatton dihang gipaundang sa 10th-round batok ni   Floyd Mayweather Jr. niadtong Disyembre 2007 ug si Pacquiao (48-3-2) nidaog sa iyang katapusang siyam ka away lakip ang paglangkat niya sa bakus sa lightweight gikan ni David Diaz ug ang katapusan dihang iyang gipaundang si De la Hoya sa ikawalong hugna sa ilang binakbakay sa welterweight. – BANAT NEWS