Cebu Selection pakyas pagsulod sa Kinoguitan Volleyball Open semis

CEBU - Nahanaw ang damgo sa Cebu Selection nga gipaluyohan sa M. Lhuillier Sports Development Foundation (MLSDF) ug Titay’s Rosquillos nga makatongtong sa semifinals dihang napukan kini sa duha ka national squads sa 4th Annual Kinoguitan Volleyball Open 2009 Fiesta Cup niadtong Domingo didto sa Municipal Gymnasium and Seawall sa Brgy. Poblacion, Kinoguitan sa Misamis Oriental.

Ang Cebu Selection mipakita og maayong labor sa pagsugod batok sa Philippine Navy ug ilang nadaog ang first set, 25-17 sa pakiglimbasog ni team captain Jonrey Sasing, Angellan Visoc, Dave Ariza ug playing coach Norvie Labuga.

Uban sa abag nilang Edward Carlo Tecson, Roderick Arenasa, Kennith Bensig, Joreem Yu, Dindo Dacaldacal, Clifford Cafe ug James Ryan Rivera, ang Cebu Selection padayon mikontrolar sa ilang momentum ug midiktar sa duwa sa ikaduhang set.

Nagkinahanglan na lang unta og duha ka puntos ang Cebu Selection sa dili pa mahuman ang second set, 23-21, apan nahagba kini dihang si Sasing migawas sa duwa tungod sa sprained ankle nga iyang nahiaguman gumikan sa dili maayo niyang pagkatugpa human mihimo og block.

Gumikan niini, gipahimuslan sa Philippine Navy ang kahigayonan ug mi-iskor og kuwatro puntos aron dag-on ang ikaduhang set, 25-23.

Sa sunod nga duha ka sets, gidominar na sa Philippine Navy ang duwa bisan pa og nipakita og maayong labok ang Cebu Selection hangtod nga naangkon ang 25-20, 25-22 nga kalampusan.

Sa lain nilang duwa sa quarterfinals, ang Cebu squad napukan sab ngadto sa Armed Forces of the Philippines pinaagi sa sweep, 25-23, 25-18, 25-15.

Gumikan niini, ang AFP mimartsa paingon sa semifinal round isip top-seed sa bracket A ug gisundan sa Philippine Navy.

Ang Cebu Selection gipaluyohan sab ni Gerardo ‘Dodong Gamay’ Frasco, Philippine Sports Commission, Port Seafood Restaurant, Hon. Danny Lim, Atty. Dionisio Cañete, Shell, Dindo Salon X’clusive, Para Travel and Tours, Guardians GBI, Vital-C, AS-ES Sportswear ug Max Agriharvest.   (BANAT NEWS)