USPF abante sa semis

CEBU - Giharos sa defending champion University of Southern Philippines Foundation (USPF) ang lima nila ka duwa sa eliminasyon sa bracket-A aron pag-abante sa semifinal sa 4th Shakey’s Girls Volleyball League didto sa USPF gym.

Nagpabiling walay pilde ang USPF ni coach Jordan Paca dihang ilang gipaluhod ang St. Theresa’s College, 25-8, 25-22 luyo sa mga paningkamot nilang Jessah Nacorda, Jinky Garidos, Dianne Navaja, Kaisse de los Santos ug sa managsuong Rexamy ug Louisse Gabriel.

Uban sa USPF sa penultimate round mao ang second-ranked Don Gerardo Ouano Memorial National High School (DGOMNHS).

Sa bracket-B, ang Abellana National School (ANS) miangkon sa katapusang luna sa semis human mikulit og 25-21, 25-22 nga kadaugan batok sa Liloan National High School.

Ang ANS napunta sa ikaduha sa bracket-B nga adunay 3-1 win-loss record, sunod sa Pajo National High School nga wala makatilaw og pilde sa upat ka duwa.

Magsangka sa crossover sunod semana mao ang USPF kinsa moharong sa ANS, samtang ang Pajo moharong sab sa DGONHS.

Ang Cebu leg sa Shakey’s Volleyball League gisuportahan sab sa Philippine Sports Commission, Dunkin’ Donuts, Petron, Toby’s ug Nature’s Spring.   (BANAT NEWS)