CBM wala pabitin sa 2nd Iloilo Dinagyang Age-Group Swimfest

Cebu - Miratsada ang Cebu Blue Marlins (CBM) sa pagsugod sa 2nd Iloilo Dinagyang Age-group Swimfest didto sa Iloilo Sports Complex sa Lapaz, Iloilo City.

Ang CBM mikabkab og 18 ka golds, 16 ka silvers ug 15 ka bronzes sa unang adlaw sa kompetisyon aron maapil sa top three sa overall standings sa 13 ka teams.

Si Anthony Linn Navarro nidaog tanan sa iyang unang upat ka events sa boys' 10-under ug maoy nangulo sa dobleng kadaugan sa CBM sa 4x50m freestyle ug medley events.

Ang iyang igsuon nga si Lyh Ann, mihakot sab og bulawan ug tulo ka silvers.

Laing pambato sa CBM nga si Kristina Angelika Torres mikabkab sab og upat ka bulawan sa girls' 6-under, samtang si Aimee Sanchez nidaog og bulawan ug duha ka bronzes sa girls' 18-under category.

Sila si Karen Indaya ug Noel Caneda, kinsa nakigtigi sa 7-8 age brackets mipupo og bulawan matag usa. Si Indaya mihakot sab og duha ka bronzes ug si Caneda adunay upat ka bronzes.

Laing CBM swimmer nga si Rhys Michale Tapang mihakot og tulo ka golds, samtang ang iyang igsuon nga si Rian Raphael mikabkab og bulawan ug tulo ka bronzes.

 Wala sab magpabitin ang managsuong Vega ug miamot sab kini og medalya sa tagsa-tagsa nila ka kategoriya. Si Michael David nidaog og silver sa 18-above category, samtang si Paula Abigail, kinsa milangoy sa 15-17 division, nidaog og tulo ka bronze medals.

Laing mitampo og medalya alang sa CBM sa unang adlaw sa aksiyon mao sila si Michael Ichiro Kong nga adunay duha ka silvers, Trina Caneda nga adunay usa ka silver ug sila si Cristine Indaya, Romylin Lina Ignacio ug Joyce Huguete nga pulos mitiltil og usa ka bulawan. – BANAT NEWS