MS Motocross 2nd leg himuon sa Daanbantayan
Cebu - Mosikad karon ang ikaduhang leg sa 2009 MS Motosuit diha sa CSCST Fisheries grounds sa Agujo, Daanbantayan.
Ang kompetisyon nga giulohan og "Agujo Motocross Challenge 2009" salmotan sa dul-an sa 50 riders sa tibuok Sugbu.
Si Seigfred Ornopia, ang "Rider of the Year" maninguha nga makaluhaan ang iyang kadaugan sa first leg niadtong Domingo didto sa sitio Tuburan, Jubay, Liloan diin siya mopakita'g aksiyon sa mas lisud nga novice division.
Si Ornopia sa Keiz BJ Motor Sales, milangkat og korona ug duha ka runners-up sa pagsugod sa 4th MS Motosuit Motocross Series nga gipaluyohan sa Castrol Philippines.
Sa iyang bahin, si Jon-Jon Adlawan, naglantaw nga morehistro og sunod-sunod nga daog sa exert division. Si Pepo Rubi, kinsa mihukom nga motabang sa teknikal nga aspeto sa kick off leg, mopakita karon og aksiyon uban sa iyang kanhi teammates nga sila si Ted Conde ug Weng Yapparcon.
Si Irwin Ramas-Uypitching mopakita karon og aksiyon human mapalta sa unang leg.
Gawas sa Castrol Philippines, ang Keiz BJ Motor Sales, Reliance Motor Part, RMO Motor Sales, Cebu Progress Marketing, MS Unlimited ug MS Digital Prints mosuporta sab ning maong leg. – BANAT NEWS
- Latest
- Trending
