Cebu - Naka-entra na sa quarterfinals ang M. Lhuillier Sports Development (MLDSF) ug Titay's Rosquillos backed-Team Cebu Selection sa nagpadayong 4th Annual Kinoguitan Volleyball Open 2009 Fiesta Cup didto sa Municipal Gymnasium and Seawall sa Brgy. Poblacion, Kinoguitan, Misamis Oriental.
Ang Cebu team yano kaayong mipukan sa Butuan team, 25-8, 25-9. Ang Cebu moharong sunod sa duha ka lig-ong koponan -- Armed Forces of the Philippines ug Philippine Navy alang sa bakanteng luna sa semifinals.
Ang Cebu Selection magsalig gihapon sa ilang team captain Jonrey Sasing, Angellan Visoc, Joreem Yu, Dindo Dacaldacal, Clifford Café, James Ryan Rivera, Kennith Bensid, Edward Carlo Tecson ug ni 1st Kinoguitan Open MVP Roderick Arenasa uban ni playing coach Norvie Labuga ug assistant coach Dave Ariza.
Gawas sa mga tropeyo ug medalya, ganting salapi ang nagpaabot sa mga mananaog.
Ang kampiyon mobulsa og P45,000, ang ikaduha makadawat og P25,000 ug ang ikatulo makaangkon og P15,000.
Ang Cebu Selection gipaluyohan sab ni Gerardo 'Dodong Gamay' Frasco, Philippines Sports Commission, Port Seafood Restaurant, Hon. Danny Lim, Atty. Dionisio Cañete, Shell, Dindo Salon X'clusive, Para Travel and Tours, Guardians GBI, Vital-C, AS-ES Sportswear ug Max Agriharvest. – BANAT NEWS