CESAFI-Partner's Cup sugdan na karon

Cebu - Mag-abot karon ang higpit nga karibal sa korte -- ang Southwestern University (SWU) Cobras-Hotel Fortuna ug ang eighth-time Cebu Schools Athletic Foundation, Inc. (CESAFI) champion University of the Visayas (UV) Green Lancers-Prime Asia Pawnshop sa main game sa pagbukas sa 3rd CESAFI Partners’ Cup diha sa Cebu Coliseum.

 Ang UV ug SWU wala pa mag-abot sa CESAFI finals, apan adunay paninglonon ang Lancers ngadto sa Cobras kinsa maoy nakapilde kanila sa miaging National Students Basketball Championship (NSBC) finals niadtong Marso sa miaging tuig dinhi sa Sugbu.

Wala pa sab mag-abot ang duha ka teams sa Partner’s Cup finals tungod kay sa miaging tuig, ang University of San Jose- Recoletos (USJ-R) Jaguars nga kanhi gipaluyohan sa CDO Burger maoy nahimong kampiyon dihang ilang gipilde ang Metro Gaisano/University of Cebu Webmasters.

Atol sa inaugural season sa CESAFI Partner’s Cup niadtong 2007, ang UV maoy midaog sa korona batok sa USJ-R.

Sa dili pa ang duwa, si kanhi kongresista Prospero ‘Butch’ Pichay mohatag og certificates ngadto sa mga sakop sa CESAFI Selection, kinsa nahimutang sa ikaduhang dapit sa 17th Kung Sheung International lnvitational Cup niadtong Disyembre didto sa Hong Kong.

Ang presidente sa CESAFI nga si Engr. Rolando Villa maoy moabag kang Pichay, kinsa maoy modawat sa silver trophy.

Sa season opener, ang two-time CESAFI finalist Aerosol/USC Warriors makigtigi batok sa R. Lapid’s Chicharon/DBTC Greywolves, samtang ang Enervon C/UC Webmasters moharong sa CDO/USPF Panthers.

Ang Ave Maria Sanctuary Park/USJ-R Jaguars mosugod sab sa ilang kampanya batok sa Virginia/CIT Wildcats.

Ang tanang Partner’s Cup sponsors lakip niini ang mga tag-iya o mga team representatives pormal sab nga ipaila sa publiko atol sa opening ceremony.

Sila mao si Dr. Edward Gaisano sa Prime Asia, Raffy Senining sa Ave Maria Sanctuary Park, Ramon Dakay sa Aerosol/Lion tiger Katol, Conrado Kho sa Enervon C, Lorenzo ‘Chao’ Sy sa Hotel Fortuna, Jerome Ong sa CDO Idol Cheesedog, Stanley Go sa Virginia Premium Corned Beef ug Rey Lapid sa R. Lapid’s Chicharon. – BANAT NEWS