SAC annual sports awards gitakda karong Pebrero 15

Cebu -  Sa makausa pa, ang Sportswriters Association of Cebu (SAC) mopasidungog na sab ngadto sa mga Sugbuanon nga misubang sa natad sa paugnat sa 2008 atol sa San Miguel Corporation-backed 27th SAC-SMC All-Cebu Sports Awards karong Pebrero 15 sa wala pa hisayring binyu.

Sa tigum nga gipasiugdahan ni SAC president John Z. Pages ug SMC representative Romelinda 'Girlie Garces niadtong miaging adlaw didto sa Laguna Garden Cafe, ang mga opisyales ug mga miyembro sa kahugpongan miayag sa inisyal nga lista sa top achievers, kinsa hatagan og pasidungog tungod sa ilang bayanihong buhat sa lain-laing sports nga gipakigbisogan sa miaging tuig.

Ang major awardees mao sila si Leizl Lumindas-Gitaruelas (athletics), Gregory Slaugher ug M. Lhuillier Kwarta-Cebu Niños (basketball), Janelle Tabio ug Floria Gutierrez (beach volley), Kimberly Lao (bowling), Donnie Nietes ug Gerry Peñalosa (pro boxing), Joseph Sanchez ug Kim Steven Yap (chess), Annabelle ug Joel Madera (dancesport), Don Bosco Technology Center (football), Irina Gabasa (golf), Alford Marimon (judo), Juan Antonio Carcel (karting), Vince Marc Tabotabo (lawn tennis), Cris Panes (shooting), Loren Dale Echavez (swimming), Michael Motel (table tennis) ug Kelly Kaye Rojas (weightlifting).

Ang multi-titled paralympian nga si Arnold Balais ituboy ngadto sa SAC Hall of Fame tungod sa makanunayong paghatag og dungog ug kabulahan sa Reynang Dakbayan sa Kasadpan sa mga higanteng torneyo dinhi sa Sugbu ug gawas sa nasud.

Sa laing bahin, ang indibidwal nga hatagan og special citation naglakip ni Lindley Fran Navaja (athletics) Doce Pares ni Grandmasters Dionisio 'Dionnie' Cañete ug Ciriaco 'Cacoy' Cañete (arnis), Jusabelle Brillo (beach volley), Jomar Jumapao (bowling), Milan Milendo (pro boxing), Charlea Lagaras (dancesport), Gio Gandiongco (golf), Sidney Metante (karatedo), Paco Rodriguez (karting), Sally Mae Siso (lawn tennis), Seigfred Ornopia ug Jon-Jon Adlawan (motocross), Yaw-Yan Cebu ArDigma Martial Arts Federation Inc. of Master Benigno “Ekin” R. Caniga, Jr. and Universal reality Combat Challenge (URCC) of Renault Lao (MMA or mixed martial arts), Angelic Lado (weightlifting) ug Luis Ansag (wrestling).

Matud ni Pages, ang SAC mopahibalo sa laing top honorees nga naglakip sa Sportsman of the Year, Presidential Awardee, ORLACSAN (Orlando C. Sanchez) Memorial Awardee ug Athlete of the Year, nga hagpaton   gikan sa major awardees.

Laing molamas sa mabulokon nga kalihukan mao ang pagtugyan sa "SAC Lifetime Achievement Award" ngadto ni Pinoy boxing hero Manny Pacquiao, kinsa mao sab ang pinasidunggang dinapit uban ni Philippine Olympic Committee (POC) chairman ug Bacolod City Rep. Monico O. Puentevella, ang adopted son sa Sugbu.

Lain pang mga inilang personalidad nga laumang motambong sa seremonyas mao si Cebu Governor Gwendolyn 'Gwen' Garcia, acting Cebu City Mayor Michael L. Rama, Cebu City Sports Commission (CCSC) chairman Michel J. Lhuillier ug councilors Sylvan 'Jack' Jakosalem ug Raul 'Yayoy' Alcoseba. – BANAT NEWS