Sekreto ni Pacquiao

Cebu - Niadtong Domingo, atong nakauban si pound-for-pound king Manny Pacquiao. Nibisita man gud siya dinhi sa Reynang Dakbayan sa Kasadpan aron pagyukbo ni Señor Sto. Niño, ang mahal ug milagrosong patron sa Sugbu atol sa adlaw sa kapistahan niini.

Sa hilom apan kinasingkasing niyang pamaagi, si Pacquiao nagtimbaya uban sa minilyon ka mga deboto ug turista pagsaulog sa engrandeng selebrasyon sa Sinulog.

Mao kadto ang labing unang pagtambong ni Pacquiao sa Sinulog. Mao sab kadto ang labing unang pagtunob niya og balik dinhi human sa iyang kadaugan batok ni Oscar de la Hoya, kinsa mi-undang sa wala pa magsugod ang ikasiyam nga hugna sa mismatch nilang engkuwentro niadtong Disyembre 6 didto sa Las Vegas.

* * *

Apan dili sama sa ubang mga politiko ug artista, wala kaayo mihimo og kasikas si Pacquiao. Iyang gipadayag dinhi kanato nga dili siya gusto nga makuha og atensiyon sa publiko kay sayod siya nga ang maong adlaw halad alang sa Balaan nga Bata ug dili kaniya.

Nahadlok si Pacman nga kun ugaling mopakita siya sa Cebu City Sports Center, mabaling na unya ang interes sa mga tumatan-aw ug mapapha lang unya niya ang gibati nilang kalingaw samtang nagtan-aw sa nindot kaayong mga pasundayag.

Ingon ana si Pacquiao. Kahibalo mobutang sa iyang kaugalingon sa tukma ug haom nga lugar. Wala niya gipaburot ang iyang kasikat sa iyang ulo. Inay iyang gipakita nga taliwala sa dili hitupngang dungog nga iyang nakab-ot, nagpabilin ang iyang mga tiil sa yuta.

* * *

Pipila ka higayon na kami nga nag-uban ni Pacquiao gikan pa niadtong dili pa kaayo sikat. Apan sa matag higayon nga kami magkita, aduna kanunay ipakita si Pacquiao nga mga butang nga makapakurat ug makasurprisa kanako.

Sama pananglit pagka-gabii niadtong Domingo, nangatkat mi sa ika-40 nga andana sa Crown Regency Hotel and Tower nga maoy giilang labing taas nga hotel sa Pilipinas.

Human malingaw pagsaksi sa maanindot kaayong fireworks display, nanganaog mi sa ika-37 nga andana sa maong higanteng edipisyo. Sa way kahadlok, si Pacquiao misakay sa Edge Coaster ug gani nagsige pa kini og katawa bisan og atong mahulagway nga niadtong tungora mura siya'g naglutaw sa hangin sa puwerting taasa nga dapit.

Wala pa matagbaw niini si Pacquiao, iya na pud gisuwayan ang Sky Walk sa ika-38 nga andana. Kami nga nagtan-aw mi-isa ang mga balahibo ug mikuro'g ang tuhod sa kakuyaw. Bisan gamay, way kurat siyang gipakita. Nagsige lamang siya og tingsi timaan sa tumang kalipay nga iyang gibati.

Sa gipakita ni Pacman niadtong higayona, atong mahambin nga posibleng mao kini ang iyang sekreto nganong wa siya'y gihadlokan ug kanunay agresibo nga mo-atubang sa bisan unsa pang hagit nga mo-abot sa iyang karera sa pamuksing. Ang dili masukod niyang kaisog sa pagsuway sa mga butang nga wala pa niya maagii ug masinati seguro maoy naghulma og susama sa puthaw nga kadasig sa iyang pagkatawo.

* * *

(Alang sa inyong mga reaksiyon o pangutana mahimong mo-email sa [email protected] o tawag sa 253-1276 local 241). – BANAT NEWS