Cebu - Misaad si pound-for-pound king Manny 'Pacman' Pacquiao nga motabang sa Philippine amateur boxing pagkab-ot sa damgo niini nga makakuha og bulawang medalya sa 2012 Olympics sa labing unang higayon.
Ang Pilipinas niadto pang tuig 1924 nga nangandoy makaani og bulawan sa Olympics.
Si Pacquaio hilom nga nibisita dinhi sa Sugbu niadtong Domingo aron makauban ang mga deboto ug turista didto sa Basilica Minore del Santo Niño.
Gawas sa pag-ampo atubangan sa imahen ni Señor Sto. Niño, nagkukalingaw sab si Pacquiao didto sa Crown Regency Hotel and Tower pinaagi sa sky adventure.
Gawas sa Sugbu, si Pacquiao miduaw sab sa Negros Occidental Multi-Purpose Activity Center (NOMPAC) alang sa Smart National Amateur Boxing Championship nga gibuksan niadtong Enero 17 nga gitambongan sa 600 ka amateur boxers.
Matud ni Pacquiao nga hugot siyang mosuporta sa boxing tungod kay mao kini ang hinungdan nganong nabantog ang Pinoy sa tibuok kalibutan. Mipadayag usab si Pacquiao nga daku kaayo siya’g salig nga makab-ot sa Pilipinas ang gidamgong gold medal ilabi na nga si Manny Pangilinan ang midumala sa Amateur Boxing Association of the Philippines (ABAP). – BANAT NEWS