SCSIT Skyblazers misakiyo korona

Cebu - Gihimong hinagiban sa Salazar Colleges of Science and Institute of Technology (SCSIT) Skyblazers pagpukan sa Team RemEMBER, 84-75 sa ilang tinaktakay nga kampiyonato aron pagsakmit sa korona sa 6th M. Lhuillier Kwarta Padala Under-21 Developmental Basketball League didto sa nagsugwak nga Consolacion Sports Complex.

Ang SCSIT Skyblazers ni coach Jojo Romarate wala manumbaling sa presyur nga niduwa atubangan sa bagang duot sa mga dumadapig sa ilang kaatbang.

Gidominar sa SCSIT Skyblazers ang tibuok duwa ug gani ilang gilubong ang RemEMBER og 11 puntos, 24-13 sa unang 10 minutos sa duwa.

Ang Team RemEMBER milaslas sa labaw ngadto na lang sa otso puntos, 29-37 sa halftime, apan ang SCSIT Skyblazers miarangkada sa ikatulong kuwarter aron inaton og balik ang labaw ngadto sa double-digits 59-47 paingon sa final quarter.

Sa laing duwa, ang Ave Maria Sanctuary Park nakamaneho pag-eskapo pinaagi sa pagpukan sa Consolacion National High School (CNHS) Black Shama sa overtime, 81-79 aron pag-angkon sa ikatulong dapit.

Ang malampusong torneyo gipasiugdahan sa M. Lhuillier Sports Development Foundation (MLSDF) pinaagi sa ilang executive director Eddie B. Ybañez ug sa tinahod nga businessman-sportsman Michel J. Lhuillier.

Puntos Matag Usa

Unang duwa:

AVE MARIA (81) - Abing 23, Olbedado 17, Senining 10, Montenegro 9, De la Rama 8, Cinco 6, Trillo 4, Pacino 2, Regalado 2

CNHS BLACK SHAMA (79) - Rio 21, Linao 16, Malagar 15, Najarro 13, Tibalan 6, Cadampog 4, Jabla 3, Conde 1

Ikaduhang duwa:

SCSIT (84) - Amarado 20, Llamedo 18, Maurillo 18, Rabaya 12, Arribal 7, Balaba 3, Paquibot 3, Salazar 2, Bigno 1

REMEMBER (75) - Valle 26, Dahil 15, Medida 10, Sanchez 8, Ermac 5, Somosot 4, Pilapil 2, Villamor 2, Tibon 2, Rohas 1. - BANAT NEWS