De los Santos, Sibayan nanghawod
Cebu - Si Mary Grace de los Santos ug Angelito Sibayan mao ang naghari sa ilang tagsa-tagsa ka dibisyon sa 2nd Mizuno-Asia Miles Sinulog Half-Marathon kagahapon sa buntag didto sa Asiatown I.T. Park sa brgy. Apas, ning siyudad.
Si De los Santos nga taga-Zamboanga, apan karon dinhi na magbasi sa Cebu milupig ni Leizl Lumindas-Getaruelas. Iyang gitapos ang 21-kilometer race sud sa usa ka oras, 27 minutos ug 48 segundos nga mibuak sa national record nga usa ka oras, 28 minutos ug 21 segundos nga gihuptan ni Getaruelas.
Bisan pa niini, si Getaruelas nagmaya gihapon kay nakaangkon kini og round trip plane ticket paingon sa Hong Kong.
Si Madelyn Carter mipahiluna sa ikatulong dapit, gisundan ni Joeyry Ann Lee ug ang garbo sa Southwestern University (SWU) nga si Mischel Gilbuena nga mipahiluna sa ikaupat ug ikalima nga dapit.
Sa men’s class, ang defending champion nga si Elmer Bartolo gipalagpot sa iyang puwesto ug napunta sa ikatulo nga dapit.
Hinuon, ang RP record nagpabilin sa mga kamot ni Bartolo kay ang nidaog karong tuiga nga si Sibayan sa Davao mi-oras lang og 1:13.01. Wala kini makabuak sa rekord ni Bartolo nga mirehistro og 1:10.20.65.
Si Rene Desuyo mitong-tong sa ikaduhang dapit, samtang si Rogelio Reli mipahiluna sa ikaupat nga dapit, gisundan ni Philip Duenas alang sa ikalimang dapit.
Si Joel Delposo maoy naghari sa 5K division, gisundan nilang Mendel Lopez ug Ian Bernido nga mipahiluna sa ikaduha ug ikatulo nga dapit.
Sa pikas bahin, si Vlessica Jagna milangkat sa korona sa 5K womens, samtang si Sheena Gacayan ug Mary Jane Beboso mitapos sa ikaduha ug ikatulo nga dapit. – BANAT NEWS
- Latest
- Trending
