CEBU - Ang Yayoy’s Grill and Resto Bar 2002 ug ang Gio Electric Motors ’88 mikuso-kuso sa ilang tagsa-tagsa ka kaatbang atol sa University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North Campus gym.
Wala kaayo paningta ang Yayoy’s Grill kay puwerte man pagkalubonga sa Arthro Kontra Arthritis ’95 sa iskor nga 103-71, samtang miagi una og kalbaryo ang Gio Electric Motors ’88 sa wala pa nila maangkon ang 74-73 nga kadaugan batok sa Maglev’90.
Ang Yayoy’s Grill wala gyud mohatag og gamay'ng gintang ug mipauwan dayon kini sa ilang opensa aron pagposte og 27-13 nga bentaha.
Wala pa makontento ang mga batos sa Yayoy’s Grill ug ilang gipaburot og maayo ang ilang labaw ngadto sa 21 puntos human sa unang tunga, 51-29. Ilang gitapos ang ikatulong kuwarter pinaagi sa 28 puntos nga bentaha, 72-44, nga maoy ilang nahimong pondasyon pagpupo og 32 puntos nga masaker dayong kapupos sa oras.
Sa sayon bahin, si Edmund Odulio mikudlit og 26 puntos, samtang si John Andrew Auza mituboy og 24 puntos alang sa Gio Electric Motors ’88 aron pagpaluhod sa Maglev ’90 sa kulbahinam kaayo nga duwa.
Ang USCBHABA gipaluyohan sa Uniherb Philippines, usa sa mga nag-unang kompanya sa nasud nga namaligya og food supplements sama sa Arthro, Heartvit, Kidneycare, Diabet ug Eyeberry.
Puntos matag usa
Unang duwa:
Gio Electric Motors (74) - Odulio 26, Auza 24, Sausa 10, Fick 8, Pagapulaan 5, Tajanlangit 4, Monterroyo 3, Pilapil 2, Reyes 2
Maglev (73) - Sievert 30, Manus 25, Ranili 6, Quinicot 6, Cagalitan 4, Tio 2
Ikaduhang duwa:
Yayoy’s Grill (103) - Abellanosa 29, Ynclino 23, Ruiz 18, Alcoseba 12, Move 12, Tan 9
Arthro (71) - Caparas 18, Solon 16, Bugtai 14, Del Rosario 7, Tumakay 6, Garcia 6, Mata 2, Libarnes 2 (BANAT NEWS)