Cebu - Ang pound-for-pound king Manny Pacquiao gipaabot nga maoy masentro sa pormal nga pagbukas sa Smart Liga Pilipinas National Championships Second Conference karong adlawa didto sa General Santos City gym.
Ipakita na sab ni Pacquiao ang iyang abilidad sa basketbol diin siya mangulo sa iyang koponan GenSan MP Warrios kinsa manalipod sa ilang balwarte batok sa bisitang Zamboanga Amores nga gikatakda sa alas-6 sa gabii.
Sa pasiunang duwa nga gitakda sa alas-4 sa hapon, ang Nigerian skycraper nga si Samuel Ekwe mopakita sa iyang labing unang duwa uban sa Trace-Laguna Stallions batok sa Ilocos Sur Bravehearts.
Sa laing bahin, ang M. Lhuillier Kwarta Padala-Cebu Niños ni team owner Michel J. Lhuillier ug legendary coach Raul ‘Yayoy’ Alcoseba andam na nga modepensa sa ilang titulo.
Ang Cebu Niños moparada ni Liga Most Valuable Player Marlon Basco, Stephen Padilla, Danny Aying, Jercules Tangkay, Woodraw Enriquez, Jerry Cavan, Ronald Bucao, Mark Jonas Ababon, Jayford Rodriguez, Rino Berame ug Ariel Mepana.
Ang bag-ong napuno sa kampo mao ang beteranong guwardiya nga si Alex Cainglet. Sila si Bruce Dacia ug Ron Capati nabutang sa free agent pool. - Yoyo R. Abayan (BANAT NEWS)