CEBU - Miabot ngadto sa 120 ka mga bata ang misalmot sa Jr. NBA Open Clinic niadtong weekend didto sa Ayala Mall.
Ang duha ka adlaw nga open clinic nga gidumala ni Jr. NBA coaches Jolly Escobar ug Elmer Cabahug kabahin sa Jr. NBA Philippines nga gipresentar sa Hi-Smart.
Sila si Cabahug ug Escobar mitudlo sa mga partisipante sa mga paagi sa pagdepensa sa bola, dribble ug uban pa.
Si Joshua Naparate, 12 anyos nga bata nga adunay deformed extremities, mipamatuod ngadto sa tanan nga dili kini babag kun ang usa mahigugmaon sa paugnat sa kusog.
Damgo ni Joshua nga mahimong pro sa umaabot.
Mga ginikanan ug sakop sa pamilya ang mihatag sa ilang hugot nga suporta ngadto sa ilang mga anak alang sa ilang dedikasyon sa basketbol.
Kapin sa 400 Cebu fans gikan sa bata ngadto sa hamtong ang mipakita sa ilang kaugalingon talento pinaagi sa pag-apil sa NBA fun games sama sa Hi-Smart Skills Challenge, Basketball TV Slam Dunk Contest, Caltex 2-Ball Game, Gatorade 3-Point Shootout, Spalding Free Throw Knockout ug Adidas Long Distance Shot.
Usa sa mga paborito sa maong kalihukan mao ang Hi-Smart Skills Challenge, diin buhaton sa mga partisipante ang lay-up, zigzag dribble around markets, three-point shot, foul shot, chest-past pinaagi sa horizontal goal ug laing finishing lay-up nga himuon ang tanan sud lang sa 45 segundos. (BANAT NEWS)