Gejon mangu sa Sinulog boxing event

CEBU - Ang ALA Promotions uban sa Summit Natural Drinking Water mopahigayon sa ilang naandan nga Sinulog boxing event -- Summit "Fight Night" boxing tour uban ang tulo ka kulbahinam nga engkuwentro karong Domingo diha sa Gaisano Countrymall car park.

Mangulo sa mga protagonista nga moaway ibabaw sa ring mao si kanhi world contender Eriberto 'Yukka' Gejon, kinsa nagtinguha nga mosikat og balik dihang iyang sangkaon si RP No. 7 Ronald Castrodes sa Manila.

Gawas niini, nagtinguha sab si Gejon nga maapil sa top 10 world contenders sa iyang dibisyon.

Laing moaway sa Summit boxing tour diin ang tuyo niini mao ang pag-explore sa potensiyal sa mga masaarong boksidor mao ang bag-ong misulbong sa ALA Boy nga si Jomanz Omanz kinsa makigsangka ni raging-bull Carlo Magale sa 10 ka hugna nga binukbukay.

Sila si Omanz ug Magale pulos mga banggiitan ug gipaabot nga dili molungtad og dugay ang ilang away.

Mokompleto sa mga boksidor sa triple main event mao ang away tali ni knockout artist James Bacon sa ALA Gym ug Jaypee Ignacio sa Elorde stable sa gikatakda nilang walo ka hugna nga kumbati.

Adunay kinatibuk-ang 46 ka rounds sa binakbakay ang gipaabot aron paglingaw sa katawhan ning libre nga kalingawan.  (BANAT NEWS)