Rama pabor nga tudloan og eskrima ang mga tanods

Cebu - Si acting Mayor Michael L. Rama sa dakbayan sa Sugbu nagkanayon nga gusto siya nga padayonon ang pagbansay-bansay og eskrima ang mga barangay tanods kay usa man kini ka matang sa self-defense ug usa ka yanong matang sa paugnat sa kusog.

Namatikdan sab ni Rama nga kusog kaayo ang paglambo sa pagsangyaw sa eskrima ngadto sa nagkalain-laing dapit sa tibuok kalibotan kung itandi sa nanglabay’ng katuigan ilabi na sa gamay pa siya. “Daghan kaayong movements ug daghan na kaayo ang maayo mo-eskrima,” matud pa niya.

Si Rama kinsa usa ka basketball fanatic, gidapit isip inducting officer ug guest speaker atol sa ika-77 nga kasumaran sa Cacoy Doce Pares World Eskrima Pangamot Federation kaniadtong Sabado sa gabii, Enero 10 didto sa ilang kwerpo sa dan C. Padilla ning dakbayan.

Sa iyang mubong pakigpulong, nanawagan si Rama sa tanang mga sakop sa Cacoy Doce Pares sa kanunay pagtamud sa prinsipyo sa ilang grupo aron mahimo na nilang sundon ang mga tunob ug panaminan ang mga nahimo sa ilang 12th dan blackbelter nga si Grandmaster ug Hall of Famer Ciriaco “Cacoy” Cañete, ang 89 anyos nga president for life sa Cacoy Doce Pares.

Si Rama nga mongisi dayon kung tawgon og “singing vice-mayor” mi-awit kaduha sa wala pa siya mobiya sa induction party.

Samtang sa laing bahin, ang presidente sa CCTN-Channel 47 nga si Nonito “Dodong” Limchua kinsa usa sab ka 10th dan eskrimador, nagkanayon nga iyang damgo nga ang tuig 2009 padayong malamboon alang sa Cacoy’s Doce Pares ilabi na kay nailhan na kini ug nasangyaw na’g maayo sa nagkalain-laing dapit sa kalibotan. Matud pa niya nga tungod sa eskrima, mahimo nang pildehon ang usa ka kaaway ilabi na og wala siya’y dalang armas o kutsilyo. Niadtong tuig 1976, nahurot nila’g kapilde ang tanang mga eskrimadors dinhi sa dakbayan apan karon dili na siya manganti kay bisan og duna pa siya’y kaabtikon, dali na man sab siyang kapoyon.

“Eskrima is considred a sports, a form of physical fitness and a self-defense so we need this,” matud pa ni Limchua. - Gabby G. Malagar (BANAT NEWS)