Cebu - Dul-an sa 100 ka tennis players gikan sa nagkalain-laing mga kahugpongan sa Kabisay-an ug Mindanao ang magtigi sa 2009 Sinulog Friendly-Dumot Invitational Tennis Tournament nga gikatakda karong Enero 12-15 diha sa Baseline tennis courts.
Mga kategoriya nga tigian mao ang Class A, B ug C.
Gawas sa host Cebu City Tennis Club (CCTC), mosalmot sab ning upat ka adlaw nga kompetisyon ang Lapu-Lapu Tennis Club, Villa Aurora, Naga, Mandaue, Compostela, La Paloma, Talamban, Baseline Aga-Gising ug Liloan.
Ang pre-Sinulog tournament gitukod sa CCTC ubos sa liderato ni Naga Councilor Boy Chiong.
Mga sakop sa technical committee naglakip nilang Atty. Frank Malilong, Ritchie Bacalso ug Joel Cortes.
Mga ganting salapi ug tropeyo ang nagpaabot sa mga palarang mga mananaog sa matag kategoriya. – BANAT NEWS