Jr. NBA Open Clinic sugdan karon diha sa Ayala

Cebu - Human sa mabungahon nga Jr. NBA Regional Selection Camp nga nakakaplag og 20 ka maayong basketeers dinhi sa Sugbu ug sa silingang mga probinsiya niadtong Disyembre 27 ug 28, ang Jr. NBA Philippines nga gipresentar sa Hi-Smart mopahigayon na sab og duha ka adlaw nga clinic sugod karong adlawa diha sa Ayala Mall-Cebu.

Ang Jr. NBA Open Clinic gidesinyo alang sa mga bata kinsa wala ma-enrolled sa mga partisipanteng tunghaan aron makasinati sa Jr. NBA program gikan sa alas-10 sa buntag hangtod sa alas-6 sa hapon diha sa Ayala Activity Center karon ug ugma.

Mga lalaki ug babaye sa tanang pangedaron lakip na ang ilang mga ginikanan ug sa tanang mga tawo mahimong mosalmot sa mall basketball experience sa  tuyo nga ma-expose ang mga batan-on ug hamtong nga mahiligon og basketbol sa NBA-style games ug skills challenges.

Sa Jr. NBA Open Clinic dinhi sa Sugbu, ang natudlong Jr. NBA coaches nga sila si Jolly Escobar ug Elmer 'Boy' Cabahug maoy mogiya sa mga partisipante sa natad sa dribbling, shooting, passing ug ball handling skills ug ingon man fitness challenges.

May pagahimuon sab nga NBA fun games sama sa Hi-Smart Skills Challenge, Basketball TV Slam Dunk Contest, Caltex 2-Ball Game, Gatorade 3-Point Shootout, Spalding Free Throw Knockout ug Adidas Long Distance Shot. – BANAT NEWS