Cebu - Ang Amancia Brokerage misandig nilang George Giducos ug Niñel Potencioso, kinsa maoy naka-iskor sa mga krusyal nga puntos sa nagkaupos na ang oras aron pangulohan ang ilang team ngadto sa 72-69 nga kadaugan batok sa Pimentel Brokers sa usa ka kulbahinam nga duwa sa 14th District Collector’s Cup 35-year below category sa miaging adlaw didto sa Vicente Sotto Memorial Gym sa barangay Punta Princesa, ning dakbayan.
Sa 35-year above division, gilampaso sa Mactan Hotmen ni coach Dacky Ugay ang C-CUPA sa iskor nga 109-65, samtang ang Office of the Commissioner (O-COM) mipukan sa District Collectors’ Office sa iskor nga 90-81.
Si Giducos nga mikulit og 16 puntos maoy nangu sa Amancia, kinsa nagbitbit na og 3-0 nga baraha, samtang si Potencisoso mitampo og 11 puntos.
Ang Pimentel nga adunay 1-2 nga baraha gipangulohan ni Adonis Morata, ang beterano sa Inter-City League pinaagi sa paghipos og 20 puntos.
Ang Pimentel ni coach Larry Villanil nahiagom sa ilang ikaduhang kaparotan kay napugngan man ang ilang tirador nga si Francis Palero kinsa igo lang naka-iskor og siyete puntos.
Sa laing bahin, ang Mactan naghupot na karon og 3-0 win-loss nga baraha, samtang ang C-CUPA wala pa makadaug sud sa duha ka duwa.
The O-COM nga adunay 2-1 nga baraha, misaka na ngadto sa ikatulong puwesto sa 35-above category, samtang ang District Collector ni coach Atty. Paul Alcazaren naghupot og 1-1 nga baraha.
Puntos Matag Usa
Amancia (72) -- G. Giducos 16, Potencioso 11, Giducos 8, Aliposa 8, Miscala 6, Tundag 5, Oñate 4, Amancia 2
Pimentel (69) -- Morata 20, Macasero 9, Palero 7, Legaspi 6, San Pablo 6, Bensi 6, Villa 6, Moral 2, Largosa 2, Manlosa 2, Arong 2. – BANAT NEWS