3rd CESAFI Partner's Cup buksan sa Enero 24

Cebu - Nagtubo ang third edition sa Cebu Schools Athletic Foundation, Inc. (CESAFI) Partner's Cup gani nagbaha ang mga kompaniya nga buot mopaluyo sa mga koponan ug ning higayona dili lamang sa duwang basketbol kondili lakip na usab ang volleyball ug football.

Sa walo ka mga partisipanteng koponan, bugtong ang Don Bosco Technology Center lang ang wala pay mipaluyo sa pagka karon.

Ang two-time defending champion University of the Visayas (UV) Green Lancers gipaluyohan na karon sa Prime Asia Lending, ang sister company sa Metro Gaisano, ang runner-up sa miaging tuig nga University of San Jose-Recoletos (USJ-R) Jaguars gisuportahan sa Ave Maria Sanctuary Park ni Raffy Senining.

 Ang lain pang sponsors mao ang Aerosol/Lion Tiger Katol ni Mon Dakay alang sa University of San Carlos, Alaska Milk alang sa University of Cebu, Hotel Fortuna alang sa Southwestern University, CDO/DOL Cheesedog alang sa University of Southern Philippines Foundation ug ang Unilab-Alaxan alang sa Cebu Institute of Technology.

Mao kini ang gibutyag sa organizers sa CESAFI Partner's Cup nga gilangkuban ni commissioner Ramon Fernandez, CESAFI commissioner Felix O. Tiukinhoy Jr. ug Atty. Baldomero C. Estenzo kagahapon sa senemanang SCOOP Forum nga gidumala ni Bobby Inoferio didto sa Baseline Restaurant.

Ang mahinungdanon sa maong kalihukan mao ang pinirmahay sa memorandum of agreement tali sa CESAFI ug sa Cebu Catholic Television Network (CCTN)-INTV nga girepresentahan nilang Tiukinhoy ug CCTN president Nonito 'Dodong' Limchua.

 Misaksi sab sa pinirmahay si Atty. Estenzo ug Fernandez sa CESAFI ug Stella Palomo-Monteno, ang Program Head sa CCTN ug si Duane Casia.

"The CCTN station is happy to serve CESAFI whether there is income or not," matud pa ni Limchua human sa MOA signing.Nanghinaot sab si Limchua

nga magmabungahon ang panagtambayayong sa CESAFI ug CCTN.

Sa iyang bahin, si commissioner Fernandez nagkanayon nga ang coverage sa CCTN makatabang og daku alang sa kompyansa sa mga magduduwa kay ang tibuok kalibotan motan-aw kanila. 

Ang CCTN makita sa United States, Canada, Australia, Japan, Malaysia ug Dubai pinaagi sa website www.intv.com.

 Ang Partner’s Cup sugdan unya sa Enero 24 hangtod sa Marso 2009 ug duwaon kini sa matag adlaw'ng Sabado ug Domingo diha sa Cebu Coliseum.

Isalida kini sa CCTN matag Lunes hangtod sa Biyernes sa 3-5 sa hapon ug mabati usab sa dyRF Radyo Fuerza. Ang ubang duwa sa Partner’s Cup dad-on sab sa mga kalungsoran.

Ang mga tiket nagkantidad og P20 sa general admission, P40 sa upper box ug P60 sa lower box. – BANAT NEWS