Cebu - Ang Pustahan Printers '80 miugkat og tournament record isip koponan nga mirehistro og dakung iskor sud lang sa usa ka duwa pinaagi sa paglubong sa Batch '82 sa iskor nga 129-62 sa nagpadayong aksiyon sa University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North campus gym.
Ang 67 puntos nga namugna sa Pustahan Printers mao sab ang labing daku nga kadaugan ning tinuig nga USCBHABA Cup sa pagka karon.
Nakapanemaho og sayo nga kadaugan ang Pustahan Printers dihang milansang kini og 23 puntos nga bentaha sa first half, 56-33.
Mitubo pa ang labaw ngadto sa 50 puntos paghuman sa ikatulong kuwarter, 99-49 nga nakapalaglag sa Batch '82.
Sa laing aksiyon, ang Gio '88 milusad og makalisang nga pangatake sa tunga-tungang bahin sa duwa aron paglubong sa Gemmary '70 sa iskor nga 84-67.
Ang Gio '88 nabitin og uno punto, 28-29 sa unang 10 minutos sa duwa sa wala pa kini milusad og 36-9 nga rally aron pagposte og 64-50 nga bentaha dayong entra sa final quarter.
Si Ray Pagapulaan maoy topscorer sa Gio '88 nga mirehistro og 22 puntos, gisundan ni Edmund Odulio sa iyang 18 puntos.
Ang USCBHABA tilt gipaluyohan sab sa Uniherb Philippines, usa sa nag-unang health companies sa nasud nga tig-apod-apod sa nabantog nga food supplements sama sa Arthro, Kidneycare, Heartvit, Diabet ug Eyeberry.
Puntos Matag Usa
Unang duwa:
Gio ’88 (84) - Pagapulaan 22, Odulio 18, Zanoria 9, Monterroyo 9, Tajanlangit 8, Auza 6, Pilapil 3, Sausa 2, Reyes 2
Gemmary ’70 (67) - Merced 18, Rivera 15, Gacatan 14, Pegano 10, Wong 6, Medina 4
Ikaduhang duwa:
Pustahan Printer’s ’80 (129) - Balangkig 46, Maniwang 39, Tobes 16, Galawsa 14, Manulat 12, Talisayaw 6, Cevesa 2
Batch ’82 (62) - Diaz 24, Belocura 14, Honorio 10, Balangkig 8. - Yoyo R. Abayan (BANAT NEWS)