2009 Liga Pilipinas Subhan Na

Cebu - Ang M. Lhuillier Kwarta Padala Cebu Niños ni legendary coach Raul “Yayoy” D. Alcoseba nagpanikad nang mosikad sa ilang kampanya pagkabkab og duha ka sunod-sunod nga nasudnong korona gumikan kay sugdan na man ang 2009 season sa Liga Pilipinas karong Enero 14 didto sa dakbayan sa General Santos.

Seguradong mas kulbahinam ug mas lisud ang kumbati ning higayona kay duna may duha ka bag-ong koponan ang mi-apil sa labing bag-o nga community-based regional basketball league sa nasud. Kini ang Manila ug ang GenSan-Pacman MP Warriors ni boxing superstar Manny Pacquiao.

Gumikan niini, mi-abot na ngadto sa 11 ka teams nga nag-representa sa tagsa-tagsa nila ka dakbayan ug probinsiya ang magbugno sa prestihiyosong kampiyonato ning liga nga gipaluyohan sa Smart Communications.

Sa unang semana sa torneyo, ang GenSan MP Warriors mo-host sa Laguna Trace Stallions, Ilocos Bravehearts ug Zamboanga Amores.

Sa dili pa subhan ang kompetisyon, ipahigayon ang usa ka simpleng seremonyas sa pagbukas nga pagatambongan ni Pacquiao, mga team owners, ug mga opisyales sa Liga Pilipinas nga gipangulohan sa presidente ug CEO niining si Noli Eala.

Lain pang mobanat sa ikaduhang season sa Liga mao ang Conference I runner up Harbour Center-Taguig Batang Global, Smart-Pampanga Buddies, Quezon Red Oilers, Iloilo Mang Inasals, ug ang MisOr Meteors.

“We broke ground in 2008 with a very successful maiden tournament. We are very happy that despite the economic crisis, many teams and their sponsors still see the value and opportunity of being part of Liga and have returned or are now part of the excitement of community basketball,” matud pa ni Eala.

Sigun sa format sa Liga, ang 11 ka teams hatagan og higayon nga maka-host og usa ka leg matag sa Tour stage diin ang mga teams magsangka dili lamang sa mini championships apan usab sa mga puntos nga ilang gikinahanglan aron sila makasud sa playoffs.

“Our unique format which really has differentiated us from all other leagues was well accepted when we first introduced it because it catered to everything we want from a tournament. So we have decided to continue it with some innovations,” pasabot pa ni Eala.

Usa o duha ka legs ang ipahigayon matag semana diin upat ka teams ang magsambunot matag leg. Moduwa sila subay ang single round robin elimination ug ang top two teams maoy mag-engkuwentro sa leg final. 10 puntos maoy ihatag sa leg champion, singko puntos sa runner-up, tres puntos sa mopahiluna sa ikatulong puwesto ug uno punto sa nangiwit nga team.

Karong tuiga, dunay tres puntos nga idugang sa bisan kinsang team nga mopakyaw og daog sa ilang mga duwa matag leg.

Human sa “Tour Stage”, i-ranking ang mga teams basi sa mga puntos nga ilang nakuha. Walo lamang ka teams ang mo-abante sa playoffs diin sila magkumbati og usab subay ang home and away, head to head format dayon na ngadto sa Liga Pilipinas National Finals. - BANAT NEWS