Gemmary/ho Tong midaug na sab

CEBU - Gikan pa lang gani sa bakasyon sa Pasko, midaug dayon ang Batch ’70 nga gipaluyohan sa Gemmary/Ho Tong Hardware human ilang giyabo ang mas batan-on nga Julie’s Bakeshop-Batch -82 sa iskor 98-78 atol sa pagpadayon sa San Carlos Boys High Alumni Basketball Association (SCBHABA) Guardo Cup sa miaging adlaw didto sa USC-North Campus gym sa dalan Gen. Maxilom avenue, ning dakbayan.

Wala gihapon kapugngi ang pagmangtas ni Jingjing Gacayan kinsa maoy nangu sa Batch ’70 pinaagi sa iyang 32 puntos ug walay’ bisan usa nga nakasanta kaniya sa habig sa Batch ’82.

Si Gacayan nakahimo na’g upat ka three-pointers pagsulod pa lang sa first quarter diin naglabaw na ang Batch ’70 sa iksor 31-8 ug padayon silang nagpatuyang og pamuntos ug milabaw sila sa halftime sa iskor, 51-27.

Si Gary Morilles maoy timbang ni Gacayan dihang ilang gikastigo ang Batch ’82 pinaagi sa iyang mga drives ug mitampo siya’g 10 puntos sa maong duwa. Laing upat nila ka kauban ang mi-iskor sab og double figures lakip niini si Bernie dela Rosa.

Ang Batch ’82 gipangulohan nilang Earl Balankig ug Boy Bantolinao kinsa parehong mi-iskor og 26 puntos.

Ang maong kadaugan naghatag sa Batch ’70 og 5-5 nga baraha samtang ang Batch ’82 mitidlum ngadto sa 1-8 win-loss nga baraha.

Puntos kada usa:

Gemmary/Ho Tong-Batch ’70 (98)— Gacayan 32, Medina 15, Rebolido 14, Monterroyo 12, Dela Rosa 11, Morilles 10, Nabua 4

Julie’s Bakeshop-Batch ’82 (78)— Balankig 26, Bantolinao 26, Belocura 17, Honorio 7, Benolerao 2 Halftime: 51-27   (Gabby G. Malagar) (BANAT NEWS)