CEBU - Kun napakyas ang mga Pinoy nga mahiligon sa boxing pagsaksi sa gikahinamang away ni pound-for-pound king Manny “Pacman” Pacquaio batok ni Oscar De la Hoya sa “Dream Match” sa Las Vegas niadtong miaging tuig, karon dili na sila mapakyas sa pagtan-aw sa laing giatngan nga panagtagbo sa duha ka ngilngig nga boksidor.
Mahitabo na ang away tali ni Pinoy brawler Bernabe Concepcion batok ni kanhi WBC International Sande Otieno sa Kenya didto sa Araneta Coliseum karong Domingo.
Ang manager ni Concepcion nga si Alioe Jaro misaad nga ipakita gyud sa iyang bata ang tanan niining abilidad sa maong away, samtang si Concepcion padayon karong nangandam sa iyang away batok sa African. Gidugang usab niini nga andam na si Concepcion nga makigtigi ni Otieno bisan kun mipasaka kini sa timbang.
“He has just grown too big for the 122-pound division. But I’m sure Bernabe will be at his best at 126 lb where he could make use of his full power,” matud ni Jaro.
Laing mopakita og aksyon sa undercard mao ang RP mini -flyweight champion Denver Cuello batok sa Indonesian junior flyweight champion Yanus Emaury ug Sonnyboy Jaro nga makigbinukbukay ni Nanpayyak Sakkipin sa Thailand.
Ang maong away ipakita sa cable sports channel nga Solar Sports live gikan didto sa kaulohan. (Arnie P. Atuel) (BANAT NEWS)