Training ni Hatton mulungtad og tulo ka buwan

CEBU - Tulo ka buwan nga wala’y puas nga training ang igahin ni IBO junior welterweight champion Ricky “The Hitman” Hatton agig pagpangandam sa umaabot nilang kumbati ni pound-for-pound king Manny “Pacman” Pacquiao karong Mayo 2 didto sa Las Vegas, Nevada.

Ang blockbuster showdown ni Pacquiao ug Hatton posibling ipahigayon sa Thomas and Mack Center o sa MGM Grand Garden Arena diin nahitabo ang makasaysayanong pagkapukan ni 10-time world champion Oscar “the Golden Boy” de la Hoya niadtong Disyembre 6 sa milabay’ng tuig.

Gibutyag sa amahan ni Ricky nga si Ray Hatton nga andam na ang iyang anak sa ipahigayong dose ka semanang ensayo, gipilian usab niyang lugar nga pagahimuan sa training mao ang Las Vegas, Florida o sa Britanya.

Gidugang usab sa amahan sa The Hitman nga iyang nakita nga lahi nga Ricky Hatton karon ang mo-away karong higayuna. Gipasidan-an angay lang nga magmatngon si Pacman. (Arnie P. Atuel)   (BANAT NEWS)