Pacquiao katulo mosaka sa ring karong tuiga
CEBU - Ang four-time world champion Manny “Pacman” Pacquiao uban sa Top Rank Bigboss nga si Bob Arum nibukas karon sa posibilidad sa tulo ka dagkong away nga muabot karong tuiga.
Sa nasayran, human sa sabut-sabut tali sa duha ka kampo, hayag na karon ang kahigayunan nga mahitabo ang gikaintapang away tali ni Pacquiao batok sa British brawler nga si Ricky “Hitman” Hatton nga gitakda karong Mayo 2 didto sa Las Vegas.
Bisan pa og wala pa ang away niya ni Hatton, nagplano usab ang kampo sa pambansang kamao nga atubangon ang kanhi pound-for-pound king nga si Floyd Mayweather Jr.
“If Floyd is not available after we fight Hatton, then we can fight Edwin Valero. There are number of people out there although the fight may not be as big as Mayweather,” matud pa ni Arum.
Lakip sa mga gipiliang boksidor ni Arum nga isabung ngadto ni Pacquiao naglangkub nila ni Joan Guzman, Zab Judah ug ang higpit nga kaatbang ni Pacquiao nga si Juan Manuel Marquez.
Sa iyang bahin, ang American trainer ni Pacquiao nga si Freddie Roach nagkanayon usab nga gusto niya nga unahun sa Pinoy boxing icon si Hatton, dayun isunod si Mayweather.
“In a perfect world, I would like to see him fight Ricky Hatton and then Floyd Mayweather Jr. and then I would like to see Manny retire, and become President of the Philippines,” dugang pa ni Roach. (BANAT NEWS)
- Latest
- Trending
