WBA padayong nagsukit-sukit kabahin sa Valuev-Holyfield fight

CEBU - Padayong gi-imbestigahan sa mga kadagkuan sa World Boxing Association (WBA) ang kontrobersyal nga resulta sa Valuev- Holyfield bout niadtong Disyembre 20 didto sa Switzerland.

Daan nang gipadayag sa WBA nga ilang imbestigahan ang resulta sa maong away karong buwana.

Ang 46-anyos nga si Holyfield napakyas sa iyang laraw nga mamahimong labing tiguwang nga mahimong heavyweight champion dihang napilde siya pinaagi sa usa ka split decision ni Valuev.

Human sa 12 ka rounds, ang higanteng Russian nga si Valuev maoy nigawas nga mananaug dihang duha ka mga judge ang nipabor kaniya, 115-114 ug 116-112 samtang ang ikatulong judge nihatag sa iyang 114-114 sa scorecard.

Human gisangyaw ang resulta sa away, wala kapugngi sa mga audience ang pagpakita sa ilang kasagmuyo sa desisyon sa tulo ka hurado tungod kay nakita nila nga dumadaug si Holyfield human sa 12 ka round nga binukbukay.

“As the World Boxing Association (WBA) always cares about and respects the fans’ and the media’s opinion, the Championship Committee has ordered a panel of judges to review the tape of the fight between Nikolai Valuev and Evander Holyfield, for the WBA heavyweight title,” matud pa sa WBA.

Dugang pa usab sa WBA nga lagmit nga usa ka rematch ang mahitabo kung mapamatud-an nila nga dili makiangayon ang nahimong desisyon sa tulo ka mga hurado.

(Lemuel P. Maglinte) (BANAT NEWS)