GM Cacoy may bag-ong libro

CEBU – Ang eskrima Grandmaster nga si Ciriaco “Cacoy” Cañete, mopagawas og bag-ong libro nga iyang sinuwat nga nag-ulohan og “Eskrima Arnis Techniques” nga gisugdan na og patik ug ibaligya na sa dili madugay.

Ang nahisgotang libro adunay 900 ka mga letrato nga nagpakita sa mga basic nga pamaagi sa eskrima. Matod pa sa 89 anyos nga Grandmaster, ang maong libro usa ka updated style kabahin sa modified basic eskrima nga gisangyaw sa mga magsoong Cañete sukad pa sa pagkatukod sa Doce Pares kaniadtong tuig 1932.

Si Cañete bag-o lang sab gipili isip lifetime president sa Cacoy Doce Pares World Eskrima Federation. Siya maoy presidente sukad pa sa 1988 dihang namatay ang iyang maguwang nga si Eulogio “Yoling” Cañete ug 20 na ka tuig siyang nagdumala sa ilang grupo.

Unya sa Enero 10, 2009, si Grandmaster Cañete ug ang ubang mga napiling opisyales sa Cacoy Doce Pares mohurar sa atubangan ni bise-mayor Michael Rama sa dakbayan sa Sugbo.

Si bise-mayor Rama sab ang gidapit isip inducting officer ug guest speaker atol sa anibersaryo sa Cacoy Doce Pares unya sa Enero 10.

Atol unya sa ilang kasumaran, adunay duha ka bisitang langyaw nga moduaw sa Cacoy Doce Pares headquarters nga sila si Zachary Whitson ug Dian Tanaka kinsa magbansay-bansay sab samtang mobakasyon og pipila ka adlaw.

Karong umaabot nga Marso, molarga na usab si Grandmaster Cañete padung ngadto sa Europe aron mopahigayon og mga seminars alang sa eskrima ug moderetso siya didto sa America. – BANAT NEWS (BANAT NEWS)