Baguio Gisugat Og Daog Sa Express
CEBU - Human sa nahitabong trade diin nakuha nila ang usa sa mga banggiitang player sa liga, ang Air21 Express nipakita sa ilang lig-on nga tinguha nga moabante sa quarterfinals dihang ilang gitagak ang Purefoods Tender Juicy Giants, 94-82 sa nagkainit nga wildcard round sa KFC-PBA Philippine Cup niadtong miaging gabii didto sa Araneta Coliseum.
Ang Express kinsa nibira sa kanhi “Slam Dunk king” nga si Cyrus Baguio gikan sa Red Bull Barakos nipukan sa Giants aron atubangon ang San Miguel Beermen sa ilang do-or-die game alang sa katapusang luna sa quarterfinals karong Domingo didto sa Big Dome.
Si Baguio uban sa pointguard nga si Celino Cruz natapon sa Express gikan sa Barakos bugti sa duha ka PBA Rookie Draft sa tuig 2011 ug tuig 2012. Si Baguio midunol sa iyang sais puntos uban ang duha ka assist sa duwa.
Ang modaug tali sa Express ug Beermen gitakdang moatubang sa reigning Fiesta Conference champion Barangay Ginebra Kings alang sa usa ka best-of-three series sa quarterfinals.Laing pares nga mag-abot alang sa quarterfinals mao ang defending all-Filipino champion Sta.Lucia Realtors kontra sa Rain or Shine Elasto Painters.
Samtang ang Alaska Aces ug Talk N’ Text Tropang Texters sayung nipahuway aron pangandaman ang ilang makontra sa semi-finals.
Si Gary David maoy nangulo sa Express sa iyang 20 puntos diin nuybe puntos niini gikan sa second quarter nga maoy naghatag sa iyang koponan sa 48-37, nga labaw sa halftime.
Nakaangkon og 20 puntos nga labaw sa third ang Express ug niburot pa kini og 24 puntos sa final period, 94-70 lakip na ang lay-up ni Baguio.
Si James Yap miposte og 26 puntos kinsa wala na maka-iskor sa fourth quarter. (Lemuel P. Maglinte) (BANAT NEWS)
- Latest
- Trending
