CEBU – Tumong karon sa mga pambato sa Sugbu nga ipadayon ang ilang pagpangharus sa Governor Petilla Invitational Road Race karong adlawa didto sa Hilongos, Leyte.
Ang torneyo nga gibahin sa class A,B ug Executive division naglangkub sa sprint ug individual race. Ang mga Sugbuanon motaak og 400 metros alang sa sprint ug laing 100 metros sa class A, 84K sa class B, ug 60K sa executive.Gawas sa medalya, ang mga mananaug makadawat og salapi nga nagkantidad og P27,000.
Kahinumduman nga ang Team Cebu maoy nidominar sa mountainbike event nga gipasiugdahan sa Hilongos Cycle One.
Si Marjun Villarosa maoy nilangkat sa first place sa 200m sprint sa under-23 category, nagsunod kaniya sila si Randy Carbonera ug Janno Canasa nga mipahiluna sa ikaduha ug ikatulong dapit. Sa 30-above class, si Celito Suarez maoy nigawas nga kampiyon, gisundan ni Jelly Sarate.
Sa 30-kilometer cross-country category, laing mga taga-Cebu nga si Judmar Villarosa, Jaybop Pagnanawon, Roy Carbonera ug Janno Canasa maoy nilangkat sa kampiyonato, nagsunod kanila ang Hindang’s squad nga misakiyo sa ikaduhang pwesto ug Hilongos Cycling One nga mipahiluna sa ikaduhang dapit. (Lemuel P. Maglinte) (BANAT NEWS)