CEBU - Gihakot sa Talisay City ang tanang titulo sa gipahigayong Gullas Cup 2008- 1st District of Cebu City Tournament. Ang Talisay milampos sa pagsakmit sa kampiyonato sa men’s basketball, men’s volleyball ug women’s volleyball.
Ang Talisay maoy nag-una sa standing gisundan sa Carcar ug Minglanilla sa maong torneyo nga gipangulohan ni Congressman Eduardo Gullas.
Usa ka adlaw ang milabay human sa mapait nilang kapildehan sa 4th Governor Gwen Garcia Unity Volleyball (GUV) Cup for Women, sila si Talisay coach Norvie Labuga ug Florian Gutierrez namawi aron malangkat ang kampiyonato.
Ang Talisay volleybelles ni-agi una og usa ka kulbahinam nga away aron hingpit nila nga mapukan ang Carcar, 25-18, 17-25, 25-15, 25-13. Samtang ang Talisay men’s team ni Edgar Mabunay nilampos usab pagdepensa sa ilang korona dihang gipilde nila ang Carcar men’s team.
Sila si Labuga ug Gutierrez maoy nilangkat sa Most Valuable Player awards sa tagsa-tagsa nila ka division.
"Grabe kaayo uy. Kapoy kaayo ming tanan tapos niabot pa gyud og fourth set ang championship namo parehas sa GUV Cup. Maayo na lang gani kay ni daog mi. Bonus pa gyud tong pagka-MVP nako," matud pa ni Gutierrez.
Sa individual awards, si Arvie Cabañero mibulsa usab sa MVP award sa men’s basketball. Uban ni Cabañero nga nisulod sa Mythical Five mao sila si Diosdado Iglamo Jr. (center), Reymund Tabar (small forward), Clifford Bargamento (point guard), ng Clint Florido (off guard).
Sa men’s volleyball, uban ni Labuga, sila si Ariel Carumba, Bon Vincent Estrera, Junrey Tapia, Constancio Estrella, ug Nathaniel Abellano maoy nikumpleto sa Mythical Six. Samtang sa women’s, nag-una si Gutierrez, gisundan ni Apple Saraum, Ivy Abella, ug Erika Camille Verano. – BANAT NEWS