Black kampiyon sa sfaa 2008 2nd Conference Inter-color

CEBU - Gisakmit sa Black team ni Nestor Kyamko ang korona sa Still Fighting Athletic Association (SFAA) 2nd conference inter-color basketball dihang ilang gipukan ang Gold team sa iskor, 83-70 sa finals kaniadtong Domingo didto sa CEC gym sa dalan Dimasalang ning dakbayan.

Taud-taud gyud nga nagsige og sikit ang duwa nga milanat sa tulo ka kwarter apan hinay-hinay nga nakabaton og kusog ang Black aron mao nay magkontrolar sa duwa ug ilang gitapos ang third period sa iskor 54-52 pinaagi sa rally nga giduslitan nila ni Jun Seno, Ricky Misa ug Paul Ocampo kinsa nakahigayon ug pamuntos gikan sa ilawom ug ingon man sa ilang mga tirada sa gawas.

Milampos gyud ang Black sa pagpugong sa Gold ug hugot nga depensa maoy usa sa nahimong hinagiban aron ma-angkon nila ang korona. Sa kalit lang, namugnaw ang Gold sa fourth period ug sukwahi sa Black nga nagsugod pagpanginit.

Ilang gitumbok ang maayong depensa nilang Kyamko ug ni Dodong Edera nga instrumento sa kadaugan tungod kay sa sayong bahin sa torneyo, ang Gold ang kanunay nagmangtas ug kanunay molansang og daug.

Dugang mga tirada sa Black gikan nilang Roger Tan ug ni Misa maoy nagtiwas sa Gold aron malamposon ang ilang kampanya sa pag-angkon sa korona tungod kay wala kapugngi ang ilang sagunson nga lay-ups.

Si Seno ug Tan maoy nangu sa Black sa ilang 13 ug 12 puntos matag usa kanila.

Si Tony Piloton mi-iskor og 16 puntos aron pangulohan ang Gold. Sila si Harris Abonitalla ug Nestor Casquejo nagkumboya og 22 puntos.

Sa preliminary games, na-angkon sa Blue team ang ikatulong pwesto human ilang gipukan ang White, 98-87 diin lima ka players pulos mi-iskor og double figures ug sa usa ka exhibition game, ang Asia Brewery Basketball Association (ABBA) mipulpog sa host SFAA All-Star 91-77.

Puntos kada usa:

First Game: (Exhibition)

ABBA (91)— Rama 23, Lansang 18, Aznar 14, Villarta 11, Fernan 10, Sarmiento 6, D. Elizondo 4, M. Elizondo 4, Alforque 3

SFAA (77)—Batad 13, Bejaresco 12, Edulantes 11, Piloton 10, Limatog 7, Edera 6, Kymako 5, Torreon 4, Nalanog 4, Viscayno 4, Tan 2, Cabangbang 2

Second Game: (For 3rd place)

Blue (98)—Viscayno 30, Mirasol 17, Gallardo 16, E. Ladonga 12, Pitogo 10, Salahid 9, Edulantes 4

White (87)—Godinez 26, Emol 19, A. Ladonga 17, Rebuya 11, Nalayog 8, Cabangbang 4, Padin 4

Third Game:(Championship)

Black (83)— Seno 13, Tan 12, Misa 11, Ocampo 10, Mata 8, Banilad 8, Dayondon 6, Lumayag 6, Kymako 5, Edera 4

Gold (70)— Piloton 16, Abonitalla 12, Casquejo 10, Cleofe 7, Bejaresco 7, Elizondo 6, Gelig 4, Ando 4, Fernandez 2, Ponseca 2. – BANAT NEWS