CEBU - Human masukamod batok sa host team Hongkong sa miaging adlaw, daling mibangon gikan sa pagkahagsa ang mga mitakas nga CESAFI All-Star RP Team ug dakung isda ang ilang nabingwit dihang naka-iskor sila og 74-64 nga kadaugan batok sa Southern California Fukienese Association (SCFA) aron pag-abante sa finals sa 17th Kung Sheung International Invitational Championships didto sa Queen Elizabeth Stadium sa Hongkong.
Gilumloman pag-ayo ni June Mar Fajardo ang undergoal diin ang 6-8 nga tore sa University of Cebu (UC) Webmasters maoy naghari ug mipugnit siya’g 16 puntos aron pangulohan ang mga Sugboanon sa ilang kampanya alang sa usa ka international nga korona sa basketball. Wala bati’g kakulba si Fajardo bisan pa sa depensa sa taga SCFA ubos sa pagtimon sa duha ka Kano nga sila si Andrew David ug Ray Reed.
Maayo kaayong pagkaduwa ni Fajardo sa poste tungod sab sa mga maayong assists gikan nila ni Armand Ponce sa University of San Jose Recoletos (USJ-R) Jaguars ug Aard Diango sa Southwestern University (SWU) Cobras.
Gawas pa sa mga maanindot kaayo nilang assists, mitampo sab og daghang puntos sila si Ponce ug Diango tungod kay pareho silang mi-iskor og double figures— si Ponce may 13 puntos ug si Diango may 12 puntos.
Sa laing bahin, si Fajardo gi-abagan sab nila ni Mannie Gabas ug Ranulfo Malinao aron pag-iskor sa ilawom. Si Gabas mi-iskor og 11 puntos ug si Malinao may 10 puntos.
Si Fajardo kinsa miduwa og 30 minutos, maoy daku’g natabang dihang na-outrebounded sa CESAFI All-Star ang SCFA, 50-33 nga maoy nakaluwas kanila gikan sa ilang 26 ka turnovers kung itandi sa SCFA nga may 19 lang ka turnovers.
Tungod sa kahugot sa depensa ug mas dagku og lawas ang mga players sa SCFA, ang puntos sa ilawom ug ingon man ang mga puntos gikan sa fastbreaks maoy hinungdan nga nakabentaha ang CESAFI All-Star ilabi na kay wala gyud makapasulod og three-point shot ang SCFA samtang usa lang ka triple ang napasulod sa mga Sugboanon gikan ni Diango.
Nakasikit na unta ang SCFA human sa third period, 56-58 apan gitiwasan sila sa CESAFI All-Star kinsa mihakot og 16 puntos sa fourth period ug napugngan nila ang SCFA ngadto sa walo lang ka puntos aron makaangkon og napulo ka puntos nga kadaugan.
Ang CESAFI All-Star daan nang naglabaw sa halftime, 48-37 ug didto na nila gidiskartehan og maayo ang SCFA sa fourth period sa 16-8 scoring run ug daw giugbok nga kandila ang mga Kano sa ilang kahikurat sa kaabtik sa mga Bisaya.
Si David maoy nangu sa SCFA sa iyang 28 puntos, may 12 puntos nga labaw sa iksor ni Fajardo apan ang kakuwang sa suporta gikan sa iyang teammates wala makahatag og kabalaka sa CESAFI All-Star. Si Reed kinsa miduwa sa kinatibuk-ang 40 minutos, mi-iskor og 18 puntos alang sa SCFA.
Si Alfred Belande, usa sa maayo uog pulso nga shooter gikan sa SWU Cobras, igo lang nakaduwa og tulo ka minutos ug wala siya maka-iskor bisan usa ka punto.
Ang CESAFI All-Star kulatado sa Hongkong, 86-105, sa miaging adlaw ug karon nga magkita sila’g usab sa finals, maningil na og bayad ang CESAFI All-Star sa ilang pagpanamastamas.
Puntos kada usa:
CESAFI All-Star (74)— Fajardo 16, Ponce 13, Diango 12, Gabas 11, Malinao 10, Delfino 4, Lasala 4, Diputado 2, Rogado 2, Belande 0, Rowe 0, Perturbos 0
SFCA (64)—David 28, Reed 18, Rinehart 8, Chuang
4, Esterbrook 2, Aquino 2, Liu 2 Halftime: 48-37 —Ni Gabby G. Malagar (BANAT NEWS)