Suico gi-ilogan sa bakus ni Ishii

CEBU - Gilangkatan sa Oriental and Pacific Boxing Federation title ang Sugbuanong si Randy “Kumong Bato” Suico dihang gipilde siya sa Hapon nga si Ichitaro Ishii pinaagi sa spilt decision sa ilang away niadtong miaging gabii didto sa Korakuen Hall sa Tokyo, Japan.

Kini ang gitaho sa fightnews.com sa Japanese boxingman Joe Koizumi. Si Koizumi nagkanayon nga si Ishii nigamit sa iyang kaidlas aron malikayan ang kumo ni Suico, samtang ang hapon nipasulod sa iyang mga counter-punch batok sa Pinoy.

Human sa 12 ka round nila nga lahugay, ang tulog ka mga hurado ni-iskor og 115-113 ug 117-110 pabor ni Ishii ug 114-113 alang kang Suico.

“Ishii cleverly moved side-to-side to refuse mixing up with the prefight favorite Suico, and scored points with right crosses and left hooks,” matud pa ni Koizumi.

Sa sixth round, usa ka makusug nga uppercut gikan ni Suico ang nitay-og ni Ishii apan dili kini igo aron mapukan ang hapones.

Si Ishii nisaka karon sa 21-2-1, 16KOs rekord, samtang si Suico ninaog ngadto sa rekord nga 28-4-1, 24KOs.Tungod sa maong kadaugan si Ishii mukatkat ngadto sa rank No..7 sa WBC ug si Suico matagak ngadto sa rank No. 11.

Ang maong kaparotan mao usab ang rason nga mameligro ang giplanong away ni Suico batok sa kanhi WBC lightweight champion David Diaz alang unta sa undercard sa Donaire-Montiel match karong umaabot nga Marso sa sunod tuig didto sa Araneta Coliseum.(Lemuel P. Maglinte) (BANAT NEWS)