Cebu - Human nila gisakmit ang kampiyonato sa miaging All-Filipino Cup season, tumong sa Sta.Lucia Realtors ang pagdepensa sa ilang titulo pinaagi sa paglangkat sa ulahing luna sa quarterfinals karong adlawa didto sa Cuneta Astrodome.
Ang Realtors maningkamot sa pagdaog karong adlawa batok sa Red Bull Barako sa ilang sangka nga gikatakdang sugdan sa alas-4:00 sa hapon aron makandado ang ilang koponan sa quarterfinals round.
Si Realtors coach Boyet Fernandez, nagkanayon nga giisip nila nga usa ka bililhon ang duwa karon batok sa Barakos.
Si Fernandez magsalig nila ni Kelly Williams, Ryan Reyes ug Joseph Yeo kinsa maoy gitahasan nga mangulo sa ilang atake kontra Barakos. Ang Realtors nga nagkupot og 9-8 win-loss nga baraha nahimutang karon sa ikalimang pwesto.
Sa ilang bahin, bisan paman og natagak na sila sa elimination round, si coach Yeng Guiao sa Barakos gusto usab gihapon nga modaug aron matagaan ang ilang dumadapig og kadaugan una sila mopahuway sa liga.
Itugyan ni Guiao ang duwa sa mga sinaligang players nga sila si Cyrus Baguio, Carlos Sharma ug ang rookie nga si Jeff Chan aron maoy musupo sa tinguha sa Realtors. Ang Barakos sayung na-eliminate sa liga tungod sa ngil-ad nga standing nila nga 5-12 win-loss card.
Sa laing bahin, laing pagsuway na usab ang atubangon ni coach Ryan Gregorio ug sa iyang Purefoods Tender Juicy Giants dihang ilang atubangon ang top seed Alaska Aces sa main game nga sugdan sa alas-6:30 sa gabii. - Lemuel P. Maglinte (BANAT NEWS)