Cebu - Hapit na mahingpit ang sabut-sabut sa duha ka dagkong boxing promotions alang sa gikahinamang Manny Pacquiao- Ricky Hatton fight nga gitakda sa Mayo 2 sa sunod tuig, human gikonpirmar ni Top Rank Big boss Bob Arum mahitungod nga sa maong away, ang Golden Boy Promotions na usab ang mipadayag sa ilang habig may kabahin sa blockbuster bout.
Ang CEO sa Golden Boy Promotions nga si Richard Schaefer, atol sa interview sa The Associated Press niadtong Huwebes nagkanayon nga hapit na mahuman ang giplanong away tali sa British boxing champion batok sa pambansang kamao. “Im encourage by the way it’s going, and I’m talking to the Hattons again,” matud pa ni Schaefer. “You really have to two of the most popular fighters of thier generation fighting each other, and that’s kind of fight we want to make.” dugang pa niya.
Si Pacquiao (48-3-2, 36 KOs) maoy nahimong labing sikat nga boksidor karon sa tibuok kalibutan human niya gipahunong si Oscar De la Hoya sa ilang away niadtong Disyembre 6. Ang Pinoy boxing icon nisaka og duha ka weight class gikan sa 135 pounds ngadto sa 147 pounds aron sangkaon si De la Hoya.
Sa iyang bahin, si Hatton (45-1, 32 KOs) kinsa bag-o palang nidaog sa katapusan niyang away batok ni Paulie Malignaggi niadtong Nobyimbre 22, gitakdang makigbinukbukay ni Pacquiao sa 140 pound division. Si Hatton nakahiagum sa bugtong niyang kapildehan niadtong Disyembre sa miaging tuig sa mga kamot ni Floyd Mayweather Jr.
Matud pa usab ni Schaefer nga ang duha ka kampo padayon pang nagsabot sa venue sa maong away, apan gusto niya nga didto sa boxing capital sa kalibutan pagahimuon ang away. “With Manny’s following in Asia and Ricky’s support in Europe, you could say Las Vegas is the center of everything.” asuy ni Schaefer.
Ang Golden Boy maoy nagkupot sa promotional deal ni Hatton samtang ang Top Rank maoy nirepresentar ni Pacquiao. Kahinumduman nga and duha ka dagkong boxing promotions niduaw diri sa Pilipinas karong semanaha aron musaksi sa birthday celebration ni Pacquiao. - Lemuel P. Maglinte (BANAT NEWS)