Viloria, Suico mo-away sa undercard ni Donaire

Cebu - Duha ka dekalibreng Pinoy boxers ang gikatakdang mopakita og aksiyon sa undercard sa Nonito Donaire-Fernadno Montiel showdown sa Marso 15 sunod tuig didto sa Araneta Coliseum.

Ang kanhi WBC light flyweight champion Brian “Hawaiian Punch” Viloria ug ang OBPF lightweight champion Randy “Kumong Bato” Suico mosaka sa ring aron makigbinukbukay sa tagsa-tagsa nila ka mga kaatbang alang sa undercard sa labing unang away ni Donaire dinhi sa Pilipinas.

Nagkanayon ang Sugbuanong topnotch promoter Rex “Wakee” Salud nga ang block buster event ipasalida live via satellite didto sa Estados Unidos ug sa uban pang parte sa kalibutan. Ang maong boxing event gi-promote ni Bob Arum sa Top Rank Promotion uban sa MP Promotions ni Manny Pacquiao.

Ang Fil-American nga si Viloria (24-2, 14KOs) makigsangka sa IBF 108-pound titlist nga si Ulises “Archie” Solis sa Mexico (28-1, 20KOs), kinsa maoy nipilde sa mga Pinoy boxer nga sila si Rodel Mayol, Bert Batawang ug Glenn Donaire.

Ang 28-anyos nga si Viloria kinsa nidaog sa katapusang lima ka duwa niini, gustong makabawi human siya gipilde ni Edgar Sosa pinaagi sa majority decision alang sa WBC belt niadtong Abril sa miaging tuig didto sa Alamo dome sa San Antonio, Texas.

Katapusang gipukan ni Viloria mao si Benjamin Garcia nga iyang gipatumba sa second round sa ilang sangka didto sa Alameda Swap Meet sa Los Angeles, California.

Sa laing bahin, si Salud nagplano nga isabung si Suico batok sa banggiitang boksidor nga si David Diaz alang sa undercard. Ang kanhi WBC lightweight champion nga si Diaz mao ang giilogan ni Pacquiao sa bakus pinaagi sa usa ka ninth round knockout.

Apan si Suico (28, 3-1, 24KOs) kinahanglan unang pildehon ang Japanese challenger Ichitaro Ishii (11-2-1, 5KOs) karong gabii didto sa Korakuen Hall sa Tokyo, Japan aron mahinayon ang maong away.

Gisugdan na usab sa IBF/IBO flyweight titlist Donaire (20-1, 13KOs) ang iyang wala’y puas nga pagbansaybansay agi’g pagpangandam sa iyang away batok ni WBO super flyweight king “Cochulito” Montiel (38-2-1, 28KOs). - Lemuel P. Maglinte (BANAT NEWS)