CESAFI stars kulatado

Cebu - Wala’y kukaluoy nga gipanitan sa host Hongkong Selection ang mitakas nga CESAFI-RP Team pinaagi sa pag-iskor og 105-86 nga kadaugan human lang nakatilaw og 75-60 nga daug ang mga Sugboanon batok sa Singapore sa nagpadayon nga aksiyon sa 17th Super Kung Sheung Cup International Basketball Invitational Championships didto sa Queen Elizabeth Stadium sa Hongkong.

Ang maong kadaugan naghatag sa Hongkong sa no. 1 spot sa Group A ug ang CESAFI All-Star midailos ngadto sa no. 2 spot.

Karong gabii, mga bug-at nga tahas ang atubangon sa CESAFI All-Star atol sa ilang pakigsangka batok sa Group B leader nga Southern California Fukienese Association sa crossover semifinals diin aduna sila’y kahigayonan pag-abante sa finals kung maka-iskor sila’g upset.

Ang mas tag-as ug hingigo kaayong taga-Hongkong, mitugot lang nga makahuygo ug maayo si June Mar Fajardo sa ilawom tungod kay ilang nasabtan nga kapoyon ra gihapon siya sa kadugayan apan wala nila pasagdi nga makapatuyang ug burak sa three-point are ang mga Sugboanon.

Si Fajardo, ang 6-8 nga higante gikan sa University of Cebu, mihakot ug 22 puntos ug maayo sab nga nakatimbang si Mannie Gabas kinsa mihipos ug 17 puntos apan mas nakabantay ang Hongkong team nga anagayn dili makahuygo ang CESAFI All-Star gikan sa three-point area ug tuod man, duha lang sa napulo ka three-pointer ang napasulod sa mga bisita gikan sa Sugbo.

Sila lang si Chris Victor Diputado ug Gabas maoy nakapasulod sa ilang three-pointers samtang ang CESAFI All-Star misipyat sab napulo ka higayon sa free throw line hinungdan nga wala gyud nila hi-apsi ang Hongkong.

Sila si Jabe Delfino ug Armand Ponce nga parehong gikan sa USJR Jaguars, may 11 ug 10 puntos apan wala masayri kung kinsa’y maayong nakaduwa sa habig sa Hongkong tungod kay wala man kini ilakip pagpadala sa email ni Eugene Fong, usa ka tournament official gikan sa Hongkong Basketball Association (HKBA)

Si Alfred Belande kinsa maoy nangu pinaagi sa iyang 15 puntos dihang ilang gilat-an ang Singapore, igo lang nakatampo ug upat ka puntos ug tataw nga gitun-an gyud sa Hongkong ang lihok sa CESAFI All-Star ug maayo ang ilang scouting report.

Nasayod ang CESAFI All-Star nga lisod pagpukan sa Southern California apan sa higayon nga ila kining ma-upset, ang CESAFI All-Star mo-abante sa finals ugmang adlawa tali sa modaug sa Hongkong ug India.

The scores:

Hongkong (105)—Yeng 17, Ting 14, Kin 14, Hing 12, Ho 12, Yee 12, Man 8, Yue 7, Wang 5, Lun 2, Wai 2 Fung 0

CESAFI-RP (86)—Fajardo 22, Delfino 11, Ponce 10, Malinao 8, Diputado 6, Belande 4, Diango 2, Rogado 2, Rowe 2, Perturbos 2, Lasala 0 . - Gabby G. Malagar (BANAT NEWS)