AIR21 Kontra Alaska

Cebu - Human sa ilang mapait nga kapildehan batok sa Red Bull Barakos, laing lisud nga tahas ang atubangon sa Air21 Express dihang makigsangka sila sa top seeded Alaska Aces karong adlawa didto sa Ynares Center. Sa dili pa mahitabo ang ilang lahugay nga gikatakdang sugdan sa alas-7:30 sa gabii, mag-abot una ang duha ka koponan nga nahimutang karon sa ilawom nga bahin sa standing nga mao ang Barakos kontra Coca Cola Tigers sa alas-5 sa hapon.

Ang Express nga naningkamot karon sa pagpalambo sa ilang standing sa ilang 8-8 win-loss nga baraha naningkamot nga makasulod ngadto sa quarterfinals round. Apan niining higayuna dili sayun ang sagubangon sa Express tungod kay ang league leaders nga Aces ang ilang atubangon karong adlawa.

Bisan pa man sa pagkawagtang sa usa sa mga sinaligang magduduwa sa iyang koponan, si Express coach Bo Perasol sa Express nagtuo nga mapukan nila ang Aces.

Itugyan ni Perasol sa mga kamot nila ni Gary David ug Arwind Santos ang pagpangulo sa ilang opensiba karong adlawa. Gidasig usab ni Perasola ang iyang mga bench players nga mopakita og nindot nga labuk aron mapahagsa nila ang Aces.

Sa iyang bahin ang Aces nga sigurado na sa ilang pwesto sa semifinals, nanganti nga dili magpalupig sa Express. Ang head coach sa Aces nga si coach Tim Cone nagkanayon nga kinahanglan nilang modaug aron magpabilin kanila ang momentum paingun ngadto sa semis.

Ang two-time MVP nga si Willie Miller maoy gitahasan nga mobahug alang sa Aces. Gawas ni Miller , sila si LA Tenorio ug Tony De la Cruz andam usab moabag sa opensa sa ilang koponan. - BANAT NEWS