Cebu - 13 ka koponan ang mopakitag aksiyon sa Community Childrens Games nga sugdan karong Lunes didto sa Cebu City Sports Center.
Ang 13 ka koponan gilangkuban sa Pit-os, Talamban, Sambag 2, Pasil, Mambaling, Apas, Kalubihan, Mabolo, Suba, Hipodromo, Tinago, Task Force ug Guadalupe.
Ang Philippine Sports Commission (PSC)-7 coordinator Danny Villadolid, nagkanayon nga nisaka ang ilang entry nga nadawat.
Ang maong event gilangkuban sa athletics, table tennis, chess, volleyball, badminton ug basketball.
Ang Badminton ug table tennis mao ang lakip sa singles ug team competition sa maong event, ang Chess gibahin usab sa boy ug girl division, samtang lima ka events ang lakip sa athletics: 100m, 200m, ug 400m run, long jump ug high jump.
Adunay ipahigayon nga meeting ang tanang mga coaches, team representatives, tournament manager ug organizers ugmang adlawa sa alas-8 sa buntag didto sa CCSC. - Lemuel P. Maglinte (BANAT NEWS)