Hawks napiang batok Celtics

Cebu - Gibalian og pako sa Boston Celtics ang Atlanta Hawks kagahapon pinaagi sa pag-iskor og kulba-hinam nga 88-85 nga kadaugan atol sa mainit nga aksiyon sa National Basketball Association (NBA) didto sa Philips Arena sa Atlanta, Georgia.

Si Keving Garnett usa sa misalbar sa Celtics dihang mi-iskor siya’g 10 sa iyang 18 puntos lakip niini ang usa ka krusyal nga alley-oop gikan ni Rajon Rondo nga naghatag kanila og 81-80 nga labaw gikan sa sikit kaayo nga fourth period diin kanunay naglabaw ang Hawks.

Duha ka free throws ni Kendrick Perkins ug turnaround shot ni Garnett daku kaayo’g gikatampo sa maong kadaugan ingon man usab sa defensive rebound ni Rondo sa kataposang siyam ka segundos human misipyat si Joe Johnson sa iyang lay-up. Si Johnson maoy nagahatag og labaw sa Hawks sa kataposang higayon, 84-83 ug gibaslan dayon ni Garnett, 85-84 ug dayon naka-iskor sab og usa ka free throw si Rondo gikan sa foul ni Mike Bibby.

Si Ray Allen maoy miselyado sa kadaugan human mipasulod sa iyang duha ka free throws, 88-85, may 7 segundos sa wala pa mohuni ang buzzer.

“I told KG to take us home down the stretch. I said make something happen. He said no problem,” matud pa ni Rondo kinsa mitampo og 15 puntos.

Si Paul Pierce nga mibalik na’g duwa gikan nagpa-eksamin sa iyang piang sa tuhod, mi-iskor og 18 puntos samtang may 16 puntos gikan kang Allen.

Ang kadaugan sa Celtics maoy ilang ika-16 nga sagunson nga daug ug naghatag sab kanila og 24-2 nga baraha, ang labing maayo sa tibuok NBA karon nga season.

“It means we’re playing well. We want to play championship basketball. That’s what we’re building up to. Our goal is to win a championship,” nagkanayon si Garnett.

Ang Celtics nagkaduol na sab karon sa pagtabla sa NBA record nga 26-2 nga nahimo sa Philadelphia Sixers kaniadtong 1966-67 season ug natablahan sa New York Knicks nianang pagka 1969-70 season. Ang pinakataas nga lanat sa daug sa Celtics 18 ka duwa.

Sa ilang duha ka pilde, ang Celtics may 10-1 sa ilang road game ug may 14-1 sa ilang home game. Ang ilang bugtong pilde sa ilang pagsulong naggikan sa mga kamot sa Indiana Pacers kaniadtong Nobiyembre 1 ug ang ilang bugtong pilde sa home game naggikan sa Denver Nuggets kaniadtong Nobiyembre 14.

Ang Hawks nga aduna nay 15-10 nga baraha, gipangulohan ni Johonson sa iyang 20 puntos samtang may 16 puntos si Marvin Williams ug parehong may 14 puntos sila si Bibby ug Smith.

Sa laing bahin, gipukan sa New Orlens Hornets ang San Antonio Spurs, 90-83, gisungay sa Chicago Bulls ang Los Angeles Clippers, 115-109, gikulata sa Cleveland Cavaliers ang Minnesota Timberwolves, 93-90, midaug ang Detroit Pistons batok sa Washington Wizards, 88-74, gitumba sa Utah Jazz ang New Jersey Nets, 103-92, midaug ang Dallas Mavericks batok sa Toronto Raptors, 96-86, midaug sab ang Philadelphia batok sa Milwaukee Bucks, 93-88 ug midaug ang Indiana Pacers batok sa Golden State Warriors, 127-120. – Gabby G. Malagar (BANAT NEWS)