Cebu - Migawas nga kampiyon ang mga personahe sa Banat News ug The Freeman atol sa gipahigayong first CENTCOM-MEDIA Fun-Shootfest 2008 sulod sa Central Command Headquarters kagahapon sa buntag.
Ang maong kalihukan maoy pagpakita sa CENTCOM sa ilang dakong pagtamod usab sa mga sakop sa Media dinhe sa Sugbu ning pagsaulog sa pasko ug sa umaabot nga Bag-ong Tuig.
Atol sa Team shootfest relay competition,nahimong kampiyon ang Team A nga gilangkuban nila ni Nimrod Quiñones Editor sa The Freeman, Ferdinand Edralin ug Niña Sumacot sa The Freeman, Bong Soriano, Rey Pasaporte ug Guam Logroño sa Banat News, Arnold Bustamante ug Paul Lauro sa DYHP/RMN Cebu.
Sa maong kompetisyon nakuha sa labing sayo nga oras sa Team A ang pito ka mga baloon nga gipunting sa mga shooters nga adunay gilay-on nga pito ka metros nga maoy naggiya alang ngadto sa ilang kadaugan.
Matud pa ni CENTCOM Commander Maj. Gen. Pedro Ike Inserto ang gibati nga kakulba ug kalisod sa mga sakop sa media nga mipaubos sa maong shooting competition kagahapon, nakahatag kini og maayong impresyon sa panaghiusa sa mga sakop sa media ug sa CENTCOM.
Gipasalamatan ni Inserto ang mga sakop sa media sa paghatag kanila og fairnes sa mga issue nga gibato kanila sa ilang mga kaatbang sa pakigbisog ug paghatag sa tukmang impormasyon sa ilang mga operasyon sa pagsumpo sa insurhensiya dinhe sa Central Visayas.
Samtang ang Presidente sa PNP Defense Press Corpse nga si Dennis Tabar mipadayag usab sa dakong pasalamat sa mga kadagkuan sa CENTCOM nga sa unang higayon, ang mga sakop sa media dinhi sa Sugbu dali ra makakuha og impormasyon sa CENTCOM kung itandi sa mga milabay'ng Commanding Generals nga dili basta-basta makasud og makakuha og impormasyon ang mga sakop sa media nga mga nanghitabo sa operasyon sa mga sakop sa militar.
Ang maong kompetisyon natapos pinaagi sa usa ka awarding ceremony ug salosalo nga gipahigayon sa VIP Lounge sa CENTCOM. - BANAT NEWS