White hari gihapon sa Triple A

Milampos sa pagdepensa sa ilang korona ang White team nga gipaluyohan sa AC Sports nga gipanag-iya ni Archie Baba ug co-sponsor Engr. Yoyo Abiera dihang ilang gipukan ang mas batan-on nga Gold quintet sa iskor, 87-82 pinaagi sa overtime ug misakmit sa kampiyonato sa Triple A Second Conference inter-color basketball tournament sa ikaduhang higayon kaniadtong Domingo didto sa Kimwa gym sa dakbayan sa Mandaue.

Ang Gold team kanunay naglabaw sulod sa tulo ka kwarter ug mihulga sa pagbaraw sa White nga gipangulohan sa 6-2 ug beteranong power forward nga si Gary Enriquez kinsa nakigkumboya nilang Rex Gonzaga ug Leo Turno apan hinay-hinay misikit ang White pagsugod sa fourth period.

Wala damha sa Gold nga nahanaw ang ilang labaw ug nabiyaan na lang ang White og upat ka puntos pagsugod sa fourth period ug hangtod nakatabla sila pinaagi sab sa hugot kaayong depensa. Ang tirada ni Gersam Armamento sa kataposang 15 segundos maoy naghatod sa duwa sa overtime sa iskor, 73-all.

Hingpit nang napugngan sa White ang mga tirada sa Gold tungod sa depensa ni Rico Ganda ug sa ilang sentro nga si Mamert dela Torre. Si Ganda maoy kandidato alang sa Defensive Player of the Year.

Dili na gani unta mag-agi pa og overtime ang White apan misipyat si ex-USP Panther Rany Cruz sa iyang tirada sa kataposang dos segundos ug dayong huni sa buzzer.

Ang ex-pro nga si Larry Villanil maoy nagsilbing lider sulod sa korte dihang na-outscore sa White ang Gold sa overtime period, 14-9 hinungdan sa ilang kulba-hinam nga kadaugan.

Si Villanil nga usa sab ka defensive gem, maoy nangu sa White sa iyang 18 puntos ug laing lima ka kauban pulos mitampo og double figures.

Sa habig sa pilderong Gold, si Enriquez miburak og 26 puntos.

Sa sayo pa, ang presidente sa Triple A nga si Tany Abay mipahibalo nga mas mabulokon ang torneyo sa sunod tuig.

Puntos kada usa:

White (87 )— Villanil 18, Quijano 14, Armamento 12, Cruz 11, Dela Torre 10, Baba 10, Ganda 4, Taborada 2, Martinito 2, Villamor 2, Retiza 2, Baunsit 2

Gold (82)— Enriquez 26, Gonzaga 15, Turno 14, Lurica 6, Varro 5, Paler 4, Baronda 2, Montilla 2, Macapaz 2. (Gabby G. Malagar)