Fr. Vic guest sa usc-sc ptca karon

CEBU - Mo-abot karong buntag ang Sugboanong commissioner sa Philippines Sports Commission (PSC) nga si Fr. Vicente L. Uy, SVD isip usa sa mga dinapit atol sa pagpahigayon sa USC-SC PTCA, Inc. Family Day diha sa South Campus sa dalan J. Alcantara ning dakbayan.

Si Fr. Uy hatagan usab og usa ka Plaque of Recognition isip pahalipay sa iyang pagkatudlo nga commissioner diha sa PSC nga gipangulohan ni chairman William “Butch” Ramirez.

Siya mao ang kanhi vice-president for finance sa University of San Carlos ug team manager sa USC Warriors sa Cebu Schools Athletic Foundation, Inc (CESAFI).

Samtang dinhi pa siya sa Sugbu, gitudlo siya isip regional director sa PSC-7 ug dayon nahimong executive director sa PSC didto sa Manila. Dili pa lang dugay, gitudlo siya ni chairman Ramirez commissioner.

Tungod sa iyang track record isip usa ka kasaligan nga sports leader ug sports manager, daku kaayo’g pagsalig si chairman Ramirez ngadto kang Fr. Uy busa iya kining girekomendar nga maoy mosunod nga chairman sa PSC.

Sunod semana, mobalik na usab dinhi sa Sugbo si Fr. Uy aron pagbukas sa iyang proyekto nga Community Outreach for Children’s Games unya sa Disyembre 22-23 diha sa Cebu City Sports Center.

Ang mga events nga pagasalmotan niining kompetisyon alang sa kabataan nga nagtungha sa publikong tunghaan mao ang athletics, basketball, volleyball, chess, tennis ug badminton.  (Gabby G. Malagar) (BANAT NEWS)