Gio Electrical Motors '88, Fabio Salsa '92 ni-ani og daog

CEBU - Managlahing dalan ang gisubay Gio Electrical Motors ‘88 ug sa Fabio Salsa ‘92 atol sa ilang kadaugan batok sa tagsa-tagsa ka kaatbang sa nagpadayong 2008 University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North Campus gym.

Ang Gio Electric Motors yano kaayong mipakirig sa Maglev ‘90 sa iskor nga 103-72, samtang ang Fabio Salsa miagi pa og tunokon nga dalan sa wala pa maangkon ang 94-92 nga kadaugan batok sa Batch 2004.

Walay pag-os-os ang pulso sa Gio ‘88 human kini miposte og 10 puntos nga bentaha sa unang kuwarter, 27-17. Ila pa kining giinat og maayo, 76-52 dayong sugod sa katapusang kuwarter.

Lima ka players ang mirehistro og double figures alang sa Gio ‘88 nga gipangulohan ni Edmund Odulio kinsa mibugha og 30 puntos, gisundan ni Bonito Zanora sa iyang 21 puntos, si John Andrew Auza miamot og 14 puntos, si Dindo Sausa mitampo og 12 ug si Ray Pagapulaan mitunol og 10 puntos.

Sa laing aksiyon, miaksiyon og takilid ang Fabio Salsa human kini miposte og 60-45 nga bentaha, apan nakabawi kini sa himalatyong oras aron pagpukan sa Batch 2004.

Puntos Matag Usa

Unang duwa:

GIO ELECTRIC MOTORS (103) - Odulo 30, Zanoria 21, Auza 14, Sausa 12, Pagapulaan 10, Tajanlangit 8, Fick 4

MAGLEVE (72) - Sievert 40, Quinicot 16, Cotelo 14, Solima 2

Ikaduhang duwa:

FABIO SALSA (74) - Alcover 19, De Leon 16, Alo 7, Rosales 4, Visitacion 3, Eratagoria 2, Del Rosario 2

BATCH 2004 (72) - Saballa 47, Andone 9, Lazo 6, Real 5, Umpad 4. - Yoyo R. Abayan (BANAT NEWS)