Alaska Gisungag Sa Red Bull

CEBU - Nipabuto sa iyang career-high 23 puntos ang rookie nga si Jeffrey Chan aron pangulohan ang Red Bull Barakos dihang ilang gipakuratan ang league leaders Alaska Aces sa iskor nga 100-80 sa nagkainit nga aksiyon sa KFC-PBA Philippine Conference kagabii didto sa Araneta Coliseum. Ang Barakos nga nagkupot karon og 4-11 win-loss nga baraha mao ang nangiwit sa standing, apan bisan paman sa kalig-on sa Aces, ila gihapon kining gipukan pinaagi sa ilang hugot nga depensa.

Si Chan ug si Michael Holper nikumboya og 15 puntos sa first-half aron itukod ang tres puntos nga labaw, 40-37, paingon ngadto sa third quarter. Sa maong kwarter niki-at na ang tanang magduduwa sa Barakos ug nitampo na usab sila sa ilang mga puntos aron mainat ilang labaw ngadto sa 69-60. Laing mikulit og double figures mao sila si Carlos Sharma ug Holper nga mipusa og 12 puntos matag usa.

Sa ilang bahin, ang pilderong Aces kinsa igo lang nikulit og 80 puntos nga layu ra sa 91.29 nga ilang average point matag duwa nakatagamtam karon sa ikalima nilang kaparotan uban ang 10 ka daog.

Ang two-time MVP nga si Willie Miller ug LA Tenorio niposte og 13 puntos matag usa aron pangulohan ang Aces, gisundan ni Sonny Thoss nga mibahug og 11 puntos ug Jeffrey Cariaso nga midunol og 10 puntos.

Padayon pa ang sangka sa Rain or Shine Elasto Painters nga nangandoy karong mo-ilog sa ikaduhang dapit batok sa Talk N’ Text Tropang Texters sa pagsulat niining balita. - BANAT NEWS