OK Ka Pare Ko, Waspee midaog

CEBU - pagsugod sa LLBA X'mas LeagueUsa ka dosenang teams nga gibungkag sa duha ka brackets ang misalmot sa Lapu-Lapu Basketball Association (LLBA) 2008 Christmas League nga gibuksan dili pa dugay.

Ang bracket-A gipangulohan sa John Videoke uban sa Rollway Customs Brokerage, Ann’s Best Travel, Verlex, Waspee ug OK Ka Pare Ko, samtang ang bracket-B gipangulohan sab sa Yan C Rico, Ace Pensionne, Salusalu, Trecia, Poby Drivers ug Thorn Hollss.

Gisugdan ang kalihukan pinaagi sa parada nga gipangulohan ni LLBA president Alan Sepe uban nilang Archi Ompad (vice president), Billy Nadado (organizer) ug Boy Castueras ug Eddie Buntis (advisers).

Sa opening game, gisubhan dayon og daog ang OK Ka Pare Ko dihang ilang gipatikangkang ang Ann’s Best Travel sa iskor nga 115-105.

Unom ka players nga gipangulohan ni Apolinar ang miposte og double figures alang sa OK Ka Pare Ko. Si Apolinar milansang og 24 puntos, gisundan ni Verzosa sa iyang 19 puntos, si Villamor miabuno og 15 puntos, si Gomez miabot og 14 puntos, samtang sila si Guicanto ug Augusto mikulit og 10 puntos matag usa alang sa maong kadaugan.

Ang pilderong Ann’s Best Travel gipangulohan ni Augusto D. kinsa mibahog og 29 puntos, gisundan ni Augusto L. pinaagi sa iyang 20 puntos.

Sa laing duwa, ang Waspee mikulit sa ilang unang daog human maka-ipsot sa kulbahinam nga duwa batok sa John Videoke sa iskor nga 99-98.

Ang Waspee gipangulohan ni Miano, kinsa miligwat og 29 puntos, gisundan ni Genelos nga miugkat og 26 puntos.

Si Macasero, kinsa mitali og 34 puntos maoy nangulo sa pilderong John Videoke.

Ang LLBA 2008 Christmas League gipaluyohan sab ni Mactan Brgy. Captain Paz Radaza ug councilor Ado Agusto.

Puntos Matag Usa

Unang duwa:

OK KA PARE KO (115) -

Apolinar 24, Verzosa 19, Villamor 15, Gomez 14, Guiganto 10, Augusto I. 10, Bontes 8, Ompad 6, Amodia 4, Lamoste 3, Aying 2

ANN’S BEST TRAVEL (105) - Augusto D. 29, Augusto L. 20, Matidios 18, Senerpida 13, Pontilla 6, Dehayco 4, Mahusay 3, Medalla 3, Cañete 3, Pagobo 2, Oyao 2, Doheleng 2

Ikaduhang duwa:

WASPEE (99) - Miano 29, Genelos 26, Espinosa 19, Dayak 5, Ybañes 4, Pepito 4, Velasques 2

JOHN VIDEOKE (98) - Macasero 34, Bello 18, Gumoz 15, Paquibot 13, Amistad 11, Bering 3, Kantila 2. - Yoyo R. Abayan (BANAT NEWS)