CEBU - Miburak na sab si Dwayne Wade og 41 puntos aron pangulohan ang Miami Heat ngadto sa ilang 100-96 nga kadaugan batok sa Charlotte Bobcats sa National Basketball Association kagahapon didto sa American Airlines Arena sa Miami, Florida.
Dili pa lang dugay, mibugha sab si Wade og 41 puntos ug kagahapon maoy iyang ikaduha karon nga season aron abagan ang Heat sa ikaupat nilang sunod-sunod nga daog aron hatagan ang iyang team og 12-9 nga baraha.
Sila si Mario Chalmers mibahog og 15 puntos ug si Shawn Marion mitampo og 13 puntos alang sa Heat.
Ang Bobcats gipangulohan ni Jason Richardson pinaagi sa iyang 24 puntos.
Didto sa FedEx Forum sa Memphis, Tennessee, ang host Memphis Grizzlies mi-iskor og 109-97 batok sa Houston Rockets. Si Rudy Gay maoy nangu sa Grizzlies pinaagi sa iyang 20 puntos, gisundan ni OJ Mayo nga adunay 18 puntos.
Ang Rockets gipangulohan nilang Luis Scola ug Rafer Alston nga parehong miposa og 16 puntos.
Sa laing duwa, gipukan sa Golden State Warriors ang Oklahoma Thunder sa iskor nga 112-102, samtang ang Orlando Magic midaug batok sa Los Angeles Clippers sa iskor nga 95-88.
Sa laing kalamboan sa NBA, gipalagpot ni Glen Taylor, ang tag-iya sa Minnesota Timberwolves ang ilang coach nga si Randy Wittman ug mitudlo sa ilang general manager nga si Kevin McHale isip bag-ong coach.
Si McHale usa sa orihinal nga Big Three sa Boston Celtics kauban si Larry Bird ug Robert Parish. - Gabby G. Malagar (BANAT NEWS)