Pistons pilde basta Domingo

Malipayon ang adlaw'ng Domingo alang sa New York Knicks ug sa ikalimang higayon, pilde na sab ang Detroit Pistons sa ilang duwa nga matumong og Domingo diin aduna na sila'y 0-5 nga kartada.

Si Chris Duhon mikamada og 25 puntos, lima ka rebounds ug siyam ka assists aron pangulohan ang Knicks ngadto sa 104-92 nga kadaugan batok sa Pistons sa nagpadayong aksiyon sa 2008-2009 season sa National Basketball Association (NBA) didto sa Madison Square Garden sa New York City. Ang Knicks naghupot na karon og 9-11 nga baraha.

Si Michael Curry nagkomedya niadtong miaging semana nga wala na siya'y mahimo kung magsige lang sila'g kapilde mata'g Domingo kay dili sab mahimo nga iyang hangyoon ang NBA nga dili na sila moduwa kung itumong anang adlawa mismo.

 Ang lima ka starting unit sa Knicks pulos gyud mihakot og double figures lakip niini sila si Quinten Richardson, Al Harington, Wilson Chandler ug si David Lee.

Si Tayshaun Prince maoy nangu sa Pistons pinaagi sa iyang 23 puntos ug 10 ka rebounds. Mibahug sab si Allen Iverson og 17 puntos ug si Richard Hamilton may 16 puntos alang sa Pistons kinsa nagbaton karon og 11-8 nga baraha.

"We just needed to win. We lost a couple of games in a row." matod pa ni Duhon.

Sa laing duwa, gitapsingan sa Portland Trailblazers ang Toronto Raptors sa iskor, 98-97 pinaagi sa three-point shot ni Steve Blake sa kataposang otso segundos.Matod pa ni Blake "that last play I got the ball and I wanted to be aggressive."

Si Blake mibugha og 19 puntos alang sa Trailblazers apan si LaMarcus Aldridge maoy nangu pinaagi sa iyang 20 puntos. Sila si Brandon Roy ug Rudy Fernandez, parehong mitampo og 16 puntos ug si Greg Oden may 10 puntos.

Ang Raptors gipangulohan ni Jermaine O'Neal pinaagi sa iyang pagburak og 24 puntos lakip sa iyang walo ka rebounds ug duha ka assists.

Ang Blazers naghupot na karon og 15-7 nga baraha ug sila maoy usa lang sa pipila ka init kaayong team--- sa ilang home games ug ingon man road games.

Mitidlom karon ang Raptors ngadto sa 8-11nga baraha.

Didto sa Conseco Fieldhouse, ang korte sa Indiana Pacers, nalikayan sa Boston Celtics ang lain na sab untang kapildehan didto sa maong lugar apan nakahigayon gihapon sila'g iskor og 122-117 nga kadaugan nga nag-agi una og lima ka minutos nga overtime.

Ang Celtics nakahipos na karon og 20-2 nga baraha nga maoy labing maayo sa Eastern Conference kumpara sa Cleveland Cavaliers nga may 17-3 nga baraha.

Sa laing duwa, midaug ang Los Angeles Lakers batok sa Milwaukee Bucks, 105-92 didto sa Staples Center sa Los Angeles, California.

Gipangulohan ni Kobe Bryant ang 17-2 nga Lakers pinaagi sa pagburak og 20 puntos samtang ang Bucks gipangulohan ni Luc Richard Mbah Moute kinsa mihakot og 14 puntos.

New York pinaka-adunahan sa NBA

Ang New York Knicks ni coach Mike D' Antoni maoy gi-ilang labing adunahan nga team sa National Basketball Association (NBA) sumala pa sa Forbes Magazine.

Ang Knicks nga atua nagduwa sa Madison Square Garden sa New York City, may balor o kantidad nga 613 milyones dolyares.

Sa listahan sa Forbes Magazine, ang Los Angeles Lakers ni coach Phil Jackson mao lang ang ikaduhang pinaka-adunahan sa ilang team value nga 584 milyones dolyares, ang ikatulo mao ang Chicago Bulls nga balor og 504 milyones dolyares, ang ika-upat ang Detroit Pistons nga may 480 milyones dolyares, ang ikalima mao ang Cleveland Cavaliers nga may 477 milyones dolyares, ang ika-unom Houston Rockets nga may 469 milyones dolyares, ang ikapito ang Dallas Mavericks nga may 466 milyones dolyares, ang ikawalo ang Phoenix Suns nga may 452 milyones dolyares, ang ikasiyam mao ang defending champion Boston Celtics nga may 447 milyones dolyares ug ang ika-napulo mao ang San Antonio Spurs may 415 milyones dolyares.

Ang pinakakabus nga nahimutang sa ika-30 sa listahan mao ang Milwaukee Bucks nga aduna lay balor nga 278 milyones dolyares.

Gi-ila sab sa Forbes Magazine ang tag-iya sa Rockets nga si Leslie Alexander maoy pinaka-adunahan nga team owner.

Ang ikaduha mao si Peter Holt sa Spurs, ang ikatulo si William Davidson sa Pistons, ang ika-upat si Mickey Arison sa Miami Heat, ang ikalima si Larry Miller sa Utah Jazz, ang ika-unom si Wycliffe Grousbeck sa Celtics, ang ikapito si George Shinn sa New Orleans Hornets, ang ikawalo si Richard DeVos sa Orlando Magic, ang ikasiyam si E. Stanley Kroenke sa Denver Nuggets ug ang ikanapulo ug kataposan sa Top 10 mao si Michael Heisley sa Memphis Grizzlies.